DILI, 04 jullu 2024 (TATOLI) – Embaixada Repúblika Indonézia (KBRI) iha Timor-Leste, iha tinan ne’e, hala’o atividade iha Oe-Cusse hodi promove turizmu no esplora oportunidade negósiu, iha área fronteira Repúblika Indonézia no Timor-Leste.
“Iha biban ida-ne’e, atu fahe informasaun ba ita boot sira kona-ba loron 5 to’o 6 jullu 2024, Embaixada Indonézia sei hala’o atividade iha Oe-Cusse ho objetivu atu hametin kooperasaun RI no TL iha área ekonomia, turizmu no kultura”, Embaixadór Indonézia iha Timor-Leste Octo Dorinus Manik dehan iha KBRI Farol, ohin.
Nia dehan, tuir oráriu katak Forúm Negósiu iha Otél Oepu hahú iha loron 5 fulan-Jullu, tuku 09:30 iha PLBN Wini ne’ebé ho objetivu atu hametin rede entre emprezáriu Indonézia no TL, liuliu sira ne’ebé hala’o atividade negósiu iha área fronteira no sorumutu ne’e sei iha asinatura komprimosiu entre negosiante TL na’in rua ho RI.
“Atividade daruak mak halai Fronteira RI no TL nu’udar rezultadu husi Embaixada Indonézia nia kolaborasaun ho Ministériu Turizmu Ekonomia Kreativa Indonézia, hodi organiza korrida maratona fronteira dahuluk entre RI no TL ne’ebé sei monu iha loron 6 fulan-Jullu, tuku 06:00 hahú husi PLBN Wini no sei termina iha Portu Mahata Oe-cusse”, nia esplika.
Nia afirma, atividade ida-ne’e primeira-vez iha fronteira entre nasaun rua ne’e, partisipante sira ne’e diversu husi Indonézia no TL, ida-ne’e atu enkoraja turizmu iha fronteira nasaun rua ne’e, tanba ida-ne’e sei enkoraja ema atu esplora liután kona-ba Oecusse.
Embaixada Indonézia, liuhosi apoiu patrosinadór sira hosi BUMN no BUMS Indonézia iha TL, prevee ona prémiu totál hamutuk $3,500 ba manan-na’in korrida maratona ne’e, to’o agora iha ona partisipante ne’ebé rejista hamutuk 500 resin. Depois sei iha mós espozisaun edukasionál ne’ebé sei aprezenta universidade prinsipál oioin husi Indonézia ne’ebé oferese bolsu estudu ne’ebé konserteza sai oportunidade ba estudante sira iha Oe-cusse no iha mós Nota Entendimentu entre Fundasaun Edukasaun Indonézia ho TL.
“Atividade finál taka ho Prestasaun Kulturál Amizade RI–TL hodi hatudu atuasaun kulturál nasaun rua nian atu bele hametin maun-alin sosiál, kultura iha fronteira no koñese malu entre parte rua. Eventu ne’e gratuita no nakloke ba públiku, komisaun sei aprezenta artista husi Indonézia, Wiz Baker nu’udar estrela bainaka iha kalan ne’e, iha mós bazar ne’ebé nakonu Indonézia no TL. Ita sei hametin relasaun bilaterál, liuliu iha turizmu ekonómiku no sosio-kulturál, ida-ne’e mak ita sei hametin, atu nune’e ezisténsia atuál Oe-cusse nian bele sai modelu, tanba ita enkoraja emprezáriu hothotu atu mai iha ne’ebá, ema hothotu atu mai iha ne’ebá para vizita”, nia esplika.
Embaixadór Indonezia iha TL, konvida ona embaixadór sira seluk husi nasaun ASEAN (Asosiasaun Nasaun Sudeste Aziátiku) atu mai tuir eventu nu’udar parte ida hosi promosaun turizmu, liuliu NTT no Oe-Cusse.
“Atividade hanesan ne’e hala’o ona iha tinan rua liubá iha Oe-Cusse, maibé iha tinan ida-ne’e Embaixada Indonézia hili atu halo Cross Border Run hodi anima eventu ne’ebé planeia atu kontinua hala’o de’it iha Oe-Cusse maibé mós iha área fronteira sira seluk hanesan Batugade (Bobnaro ) no Salele (Covalima) hodi promove poténsia iha área fronteira sira”, nia konklui.
Jornalista : Felicidade Ximenes
Editór : Zezito Silva
