DILI, 22 Juñu 2026 (TATOLI)-Tenente Jenerál Lere Anan Timur hato’o ninia sentidu kondolénsia kle’an tebes ba Prezidente Partidu FRETILIN, antigu Prezidente Repúblika, antigu Prezidente Asembleia Konstituinte, Francisco Guterres Lú-Olo, ne’ebé termina ona ninia peregrinasaun iha mundu ne’e iha loron domingu (21/06), iha Ospitál Prince Court, Kuala Lumpur, Malázia.
“Iha momentu triste ida-ne’e, ha’u ho família aprezenta ami-nia kondolénsia kle’an tebes ba falesimentu saudozu Kamarada Francisco Guterres Lú-Olo. Ha’u nu’udár kompañeiru da luta, sente lakon boot ba ha’u-nia irmaun ida, uluk ami moris hamutuk iha situasaun difísil nia-laran”, Lere hato’o mensajen ne’e liuhusi nia pájina ofisiál Facebook, ne’ebé Tatoli asesu.
Ba Lere, eis-Prezidente Lú-Olo nia mate fó hanoin ba momentu luta ba Timor-Leste nia ukun rasik-an no nia sente fuan-kanek tebes tanba lakon kompañeiru di’ak ida iha nia nia sorin.
“Ami agradese ba dedikasaun no servisu valiozu ne’ebé fó ba sosiedade no nasaun doben Timor-Leste dezde tempu luta ba libertasaun nasionál. Maromak sei simu nia obra di’ak no legadu ne’ebé nia husik hela, no fó deskansa eterna ba nia”, nia espresa.
Notísia relevante: Matan Ruak manifesta sentidu triste ba falesimentu eis-Xefe Estadu Francisco Guterres Lú-Olo
Jornalista: Arminda Fonseca
Editora: Maria Auxiliadora
