DILI, 05 jullu 2024 (TATOLI) – Ministériu Komérsiu no Indústria (MCI) hamutuk ho liña ministeriál sira hodi diskute atu muda dekretu lei kréditu SUAVE ba kréditu SAUDAVEL. Razaun, ho mudansa ne’e katak antes ne’e atu asesu ba kréditu rekomenda husi ministériu maibé agora kritériu tomak husi banku no banku rasik mak sei selesiona diretamente.
“Ami diskute ona ho ministériu relevante sira hanesan Ministériu Koordenadór ba asuntu Ekonómiku (MKAE), Ministériu Agrikultura, Peska, Pekuária no Floresta (MAPPF), Ministériu Transporte no Komunikasaun (MTK), Sekretaria Estadu ba Kooperativa (SEKOOP), Sekretaria Estadu ba Formasaun Profisionál no Empregu (SEFOPE), oinsá atu kontinua fó apoiu ba Empreza Mikro Pequena no Média liuhusi kréditu, entaun antes ne’e ita tau kréditu SUAVE maibé agora ita atu muda ba kréditu SAUDAVEL”, Vise Ministru Komérsiu no Indústria Agusto Junior Trindade, dehan, iha Hotel Timor, ohin.
Notísia relevante:Governu prepara kontinua programa kréditu suave iha tinan 2025
Nia informa, mudansa dekretu foun ne’e envolve mós Banku Komérsiu Nasionál Timor-Leste (BNCTL) nu’udar fornesedór kréditu iha prosesu selesaun inisiál, atu nune’e sira bele garante sustentabilidade ba Empreza Mikro Pequena no Média sira atu kontinua halo inovasaun.
“Diferensa mak antes ne’e rekomenda diretamente husi ministériu, maibé agora ami fó direitu tomak ba banku sira atu fó kritériu no selesiona nune’e sira bele toma ho sériu, maibé sé sira halo tuir de’it rekomendasaun sira sei laiha garantia, karik sira falla,” nia informa.
Nia rekoñese katak Governadór Banku Sentrál Timor-Leste (BCTL, sigla portugés), Helder Lopes mós aprova ona inisiativa ne’e atubele fó apoiu liután ba setór produtivu sira iha rai-laran.
Trindade husu atu sistema bankaria iha Timor-Leste fasilita Empreza Mikro Pequena no Média liuhusi fó kritériu simples atu nune’e ekonomia bele la’o, tanba tuir relatóriu BCTL, oras ne’e daudaun iha osan banku liu billaun $2, maibé sira ne’ebé uza ba kréditu seidauk atinje billaun $1.
Tuir relatóriu, Governu anteriór liuhusi Ministériu Turizmu, Komérsiu no Indústria (MTKI), fundu hamutuk $1,380,330,00 aloka ona ba programa kréditu SUAVE ho $371,000 fahe ona ba setór privadu 23 husi totál 90 setór privadu sira ne’ebé aplika aplikasaun kréditu dezde lansamentu programa ne’e iha 2021.
Dekretu Jurídiku nú. 8/2022 loron 16 fevereiru kona-ba kriasaun limite kréditu ba fasilidade empréstimu kréditu SUAVE iha akordu mútua ho funan 3% ba kada emprestadór.
Individu sira husi setór privadu ne’ebé elijível bele aplika ba empréstimu sira ho variasaun husi $1,000.00 to’o $25,000.00 ho prazu pagamentu másimu tinan tolu. Kolaborasaun ne’e envolve entidade oioin hanesan Programa Nasaun Unida ba Dezenvolvimentu (PNUD), Instituisaun Apoiu ba Dezenvolvimentu Emprezariál (IADE) no Banku Nasionál Komérsiu Timor-Leste (BNCTL) hodi garante asesu ba kréditu ba setór privadu iha área rurál.
Notísia relevante:MCI kompromete atu kontinua programa Kréditu Suave hodi diversifika ekonomia TL
Jornalista : Felicidade Ximenes
Editór: Rafael Ximenes de A. Belo
