DILI, 05 Jullu 2024 (TATOLI) – Ezekusaun Orsamentu Jerál Estadu (OJE) 2024, entre janeiru to’o juñu 2024, foin atinje 32% ka ekivalente ba $585.342.597 husi totál billaun $2,2, informa Diretór-Jerál Planeamentu Orsamentál, Ministériu Finansa (MF), José Alexandre.
Ezekusaun ne’e ba kategoria Saláriu no Vensimentu atinje $191.186.162 (41%) husi montante millaun $468, Bens no Servisu 78.367.147 (20%) husi totál $386.336.005, Kapitál Menór 5.923.126 (17%) husi $34.204.055, no Kapitál no Dezenvolvimentu $34.389.727 (8%) husi 410.996.289.
“OJE 2024 nia husi janeiru to’o juñu 2024 foin ezekuta 32% ho nia ekivalente $585.342.597”, José Alexandre reitera iha nia aprezentasaun iha Jornada Oramentál 2025, ne’ebé realiza iha Ministériu Finansa, ohin.
Iha biban ne’e, Primeiru-Ministru Xanana Gusmão, hateten nia parte rekoñese ezekusaun OJE 2024 sei ki’ik liu iha Kapitál Dezenvolvimentu, maibé nia esplika katak atu halo ezekusaun ba projetu boot presiza haree didi’ak, nune’e labele fó risku ba osan Estadu.
“Ita espera iha fulan oin mai kada ministériu bele ezekuta ho di’ak, maibé tenke haree ho di’ak tanba osan ne’e povu nian, tenke jere ho di’ak”, nia afirma.
Relasiona ho ezekusaun OJE, Prezidente Komisaun C iha Parlamentu Nasionál ne’ebé trata asuntu Finansa Públika, Cedelízia Faria dos Santos, husu Governu atu aselera ezekusaun OJE 2024, tanba sei ki’ik.
Deputada husi bankada CNRT ne’e dehan Governu hato’o ona katak ezekusaun ki’ik ne’e, liuliu iha Kapitál no Dezenvolvimentu.
Tuir nia, problema barak Governu sei haree atu halo pagamentu ba empreza sira-ne’ebé durante ne’e hasoru hela problema no konkursu públiku ba projetu sira ne’e foin mak loke. Tanba ne’e mak sai kestaun ba taxa ezekusaun sei tuun.
Tuir fiskalizasaun komisaun nian, iha baze sei hasoru problema hanesan estrada barak sei aat, ponte barak sei kotu no edifísiu balun ne’ebé presiza halo reabilitasaun.
Orsamentu sira ne’ebé tau iha Kapitál no Dezenvolvimentu bainhira la ezekuta, entaun nia impaktu boot ba dezenvolvimentu nasaun nian.
Notísia relasionada: Komisaun C iha PN husu Governu aselera ezekusaun OJE 2024
Jornalista: Arminda Fonseca
Editora: Maria Auxiliadora
