Governu organiza jornada orsamentál hodi define prioridade no tetu fiskál ba 2025
DILI, 05 Jullu 2024 (TATOLI) – Governu realiza, ohin, Jornada Orsamentál 2025 hodi prepara Orsamentu Jerál Estadu (OJE) 2025 ho tema “Investe iha infraestrutura estratéjiku, hakbiit ekonomia no hadi’ak sidadaun nia moris-di’ak”, ho objetivu atu define prioridade Ezekutivu no tetu fiskál ba tinan oin.
Sorumutu Jornada Orsamentál hala’o iha Auditóriu Kay Rala Xanana Gusmão, iha Ministériu Finansa, Dili.
Tuir komunikadu ne’ebé Tatoli asesu, eventu ne’e sei hahú iha tuku 8:30 dadeer no sei iha diskursu abertura husi Primeiru-Ministru, Xanana Gusmão.
“Sesaun daruak sei analiza matéria makroekonómiku, estratéjia orsamentál no dezempeñu setór finanseiru. Iha parte dadeer, sei aprezenta mós propostas ba prioridade, despeza obrigatória no senáriu ba tetu fiskál 2025. Iha loraik, partisipante iha enkontru ida-ne’e sei diskute tópiku sira ne’ebé aprezenta no sei define prioridade no tetu fiskál ba OJE 2025 nian”, nota ne’e informa.
Tuir prioridade ne’ebé define, liña ministeriál sei prepara sira-nia proposta orsamentu setoriál atu bele analiza hosi Komisaun Revizaun Orsamentu, entre loron 12 no 27 fulan-Agostu 2024.
Notísia relasionada: Governu realiza jornada orsamentál hodi konkretiza medida Lei GOP 2023
Jornalista: Arminda Fonseca
Editora: Maria Auxiliadora
