DILI, 05 Jullu 2024 (TATOLI) – Konstrusaun estrada husi postu administrativu Laga bá Baguia, iha munisípiu Baucau, suspende provizoriamente tanba hetan impendimentu husi komunidade.
Ministru Obra Públika, Samuel Marçal, hateten tuir informasaun husi tékniku sira iha terrenu katak projetu konstrusaun la la’o, la’ós tanba mákina atu apoia serbisu mak laiha, maibé tanba hetan impedimentu hodi halo obra ne’e la’o tarde.
“Iha tempu badak ha’u tenke bá haree diretamente hodi halo diálogu ho komunidade hodi hatene kauza loloos husi situasaun sira iha terrenu, nune’e bele rezolve. Tanba antes ne’e, Governu selu ona indemnizasaun”, Samuél Marçal dehan iha Ministériu Finansa, ohin.
Lembra katak, iha Fevereiru 2023, Governu serbisu hamutuk ho Banku Nasionál Komésiu Timor-Leste (BNCTL) halo ona pagamentu ba komunidade afeta sira husi postu administrativu Laga no Baguia, munisípiu Baucau, hamutuk 450. Husi númeru ne’e fó indemnizasaun la hanesan, balu hetan montante ki’ik no seluk boot depende ba sira-nia rai no ai- horis sira.
Totál orsamentu ne’ebé BNCTL halo pagamentu ba vítima sira hamutuk $677.968,80, husi montante ne’e balun hetan pagamentu boot liu rihun $39 no kiik liu mak $310.
Konstrusaun estrada Laga-Baguia ezekuta husi empreza Norinco International Cooperation Lda ho orsamentu hamutuk millaun $22 ho durasaun tinan rua nia-laran. Projetu ne’e hetan supervizaun hosi konsultór PT. Inacon Luhur Pertiwi, JV Kai Watu Kmanek Consultant, Unip. Lda, no PT. Sinotech Engineering Indonesia.
Notísia relevante: Reabilitasaun estrada liga Laga-Baguia la’o di’ak maski neneik
Jornlista: Arminda Fonseca
Editora: Maria Auxiliadora
