DILI, 05 Jullu 2024 (TATOLI) – Polísia Nasionál Timor-Leste (PNTL), liuhusi Departamentu Tránzitu no Seguransa Rodoviária Nasionál rekolla, iha Juñu, reseita hamutuk $21.576 ba kofre Estadu.
Komandante Tránzitu no Seguransa Rodoviária Nasionál, Superintendente Asistente Luís da Costa, hateten reseita ne’e akumula husi parte infrasaun hamutuk $7.650 no mai husi fronteira Sakato, Batugadé no Mota-Masin hamutuk $13.926.
“Polísia Tránzitu kontinua hatama resita ba kofre Estadu ne’ebé akumula husi reseita fronteira nian inklui infrasaun ne’ebé infratór sira uza transporte públiku no privadu la kumpre regra no la respeita Lei Kódigu Estrada nian”, Superintendente Luís dehan iha Caicoli, ohin.
Komandante Tránzitu salienta katak iha Juñu rejista infratór hamutuk 546 ne’ebé kontra orden autoridade, uza transporte no la lori dokumentu orijinál, karta inspesaun liu ona prazu no la uza kapasete, inklui kontra sinál tránzitu.
Superintendente Polísia Luís da Costa adianta katak reseita ne’ebé rekolla husi Janeiru to’o Juñu hamutuk $77.586.
Jornalista: Tomé Amado
Editora: Maria Auxiliadora
