UPF-TNI organiza patrullamentu iha fronteira Tapo-Memo no Delomil
BOBONARO, 05 jullu 2024 (TATOLI)-Unidade Patrullamentu Fronteira (UPF) Kompania Alfa Tunubibi lidera hosi Inspestór Polísia Alberto Almeida, hamutuk ho Satuan Tugas Penyamanan Perbatasan Satgas-Pamtas (RI-RDTL) Tentara Nasional Republik Indonesia (TNI) postu Delomil, junta ho Polísia Repúblika Indonézia, sesta ne’e halo patrullamentu koordenada iha liña fronteira entre Timor-Leste no Indonézia.
Iha atividade patrullamentu ne’e autoridade seguransa rua ho arma kompletu no kesi RDTL-RI, la’o-ain ho distánsia ne’ebé dook, hahú husi fronteira entre suku Tapo-Memo ho Delomil no kontinua ba remata iha fronteira entre Mozon Tunubibi ho Turiskai.
Patrullamentu ne’e realiza bazea ba pedidu husi TNI ho objetivu atu halo kontrolu hodi prevene atividade tranzaksaun ilegál, alende ne’e atu hametin lasu amizade entrega seguransa rai-rua iha liña fronteira hodi garante soberania Timor-Leste ho Indonézia seguru ba sidadaun sira hotu.
Notísia relevante: UPF-TNI sei realiza jogu amizade iha fronteira
“Ha’u reprezenta Danki husi Satgas Pamtas RI-RDTL kompi Pengaman II, Dampos Delomil, hato’o obrigadu ba UPF ne’ebé partisipa iha patrullamentu konjunta ne’e, espera operasaun konjunta ne’e hametin lasu amizade,” Dampos Delomil Kipam II, Letda Infantari, Arfian Yudha Baktian, hateten.
Durante la’o hamutuk forsa rua ne’ebé mai ho uniforme la hanesan no lian ketak-ketak ne’e nafatin kumpre orden hodi hakur mota, la’o iha fatuk kro’at nia leten no tama du’ut laran to’o kosar sulin habokon uniforme ne’ebé prega ho emblema nasaun nian.
Notísia relevante: UPF- Satgas TNI organiza patrulla konjunta iha fronteira Haumeni Ana Pássabe
Jornalista: Sérgio da Cruz
Editór: Evaristo Soares Martins
