DILI, 05 Jullu 2024 (TATOLI) – Primeiru Ministru, Xanana Gusmão, husu ba Sekretária Estadu Kooperativa (SEKoop) atu serbisu hamutuk ho setór privadu sira dezenvolve kooperativa, liuliu hasa’e produsaun hodi hatán ba merkadu lokál.
Xefe Governu hato’o ida ne’e, hafoin Sekretáriu Estadu Kooperativa, Arsénio Pereira da Silva, aprezenta nia ideia iha sorumutu Jornada Orsamentál 2025, hodi solisita ba Governu tau prioridade ba kooperativa iha Orsamentu Jerál Estadu (OJE) sira, tanba kooperativa mak sai pilár importante ida hodi hasa’e ekonomia iha país tuir Konstituisaun iha artigu 138.
Daudaun ne’e, kooperativa ne’ebé eziste iha Timor-Leste hamutuk 222 ho nia totál membru hamutuk rihun 31-resin ne’e halo ona kontribuisaun finanseira hamutuk millaun $17.
“Kooperativa iha orsamentasaun, ita-boot sira husu atu tau osan barak, maibé ida ne’e la’ós atu loke tan kooperativa ne’ebé barak, maibé ho kapitál millaun $17 ne’ebé iha ona agora, SEkoop tenke halo programa ida oinsá mak apoia kooperativa produtiva sira ne’ebé dezenvolve hodi hatán ba merkadu lokál no bele halo esprortasaun”, Xanana Gusmão responde ba pedidu SEkoop nian atu tau mós prioridade ba sira, iha ámbitu Jornada Orsamentál 2025, ne’ebé realiza iha Ministériu Finansa.
Xefe Ezekutivu ne’e salienta katak presiza envolve setór privadu sira oinsá atu aumenta produsaun lokál no fa’an produtu bá iha merkadu nasionál no internasionál sira.
“La’e, ita mak nune’e hela de’it, kooperativa halo produsaun barak maibé la halo jestaun di’ak mak atu kontribui ba dezenvolvimentu ekonomia ne’e susar, tanba komunidade ka povu sei falta informasaun oinsá atu halo negósiu”, nia hateten.
Xanana fó ezemplu mak bainhira fa’an ai-fuan hanesan hudi, maske haree atu dodok ona más nia folin nafatin aas, entaun setór privadu no SEKoop hamutuk haree situasaun ne’e, oinsá atu fasilita kooperativa sira ho formasaun negósiu nian no seluk tan.
Kooperativa ne’ebé daudaun eziste mak iha área kréditu, agríkola, pekuária no seluk tan.
Notísia relevante: Kooperativa Halibur Fini rai produtu to’o aat tanba ema la sosa
Jornalista: Arminda Fonseca
Editora: Maria Auxiliadora
