DILI, 08 Jullu 2024 (TATOLI) – Na’in ba empreza Keshavarz, Ayup Joseph Karimi, rejeita deklarasaun husi sidadaun pakistanés na’in-10 katak empreza viola sira-nia direitu no halo tráfiku umanu hasoru sira.
Propetáriu empreza internasionál ne’e haktuir katak nia la konkorda ho saida maka sidadaun sira husi Pakistaun hato’o ba Polísia Nasionál Timor-Leste, liuhusi Departamentu Investigasaun Kriminál (DIP) Nasionál katak sira hetan tratamentu la di’ak husi empreza.
Nia lamenta ho deklarasaun ne’ebé sidadaun pakistanés sira hateten to’o agora la simu saláriu ne’e laloos, tanba hanesan umanu nia mós hakarak haloos asuntu balun kona-ba sidadaun sira ne’e nia hahalok.
“Sira na’in-10 mai serbisu iha Timor-Leste ne’e hetan duni rekrutamentu husi ami-nia kompañia tuir idaidak nia área. Husi rekizitu ne’ebé ami presiza ne’e ema espesífiku ba doutór animál no mós iha área finansa nian. Na’in-10 ne’e prienxe tiha rekizitu depois ami haruka mai. Bainhira to’o iha Timór, sira serbisu no ami haree sira la hatudu kualidade hanesan ema ne’ebé profisionál iha área sira ne’e”, Ayub Karimi preokupa iha nia rezidénsia, iha Kuluhun.
Tanba ne’e, empreza husu sertifikadu profisionál husi pesoál sira ne’e, maibé sira lakohi aprezenta, nune’e empreza ameasa atu hapara sira husi serbisu maka sira foin submete dokumentu idaidak nian. Husi ne’e, empreza konsege deteta sira na’in-10 ne’e balun la’ós peritu iha área sira ne’ebé empreza presiza.
“Kompañia presiza ema iha doutór animál no iha finansa, maibé sira mai ne’e doutór nehan nian. Sira la’ós ema iha área finansa, maibé serbisu iha to’os. Nune’e maka empreza deside hapara pesoál sira ne’e, tanba la prienxe rekizitu, maibé sira hotu la konkorda. Mezmu sira balun la prienxe kritériu, maibé ita selu sira-nia saláriu iha tempu serbisu ne’ebé sira halo ona. Agora, sira hotu hakarak sai, entaun sira halo barullu hodi baralla atividade iha serbisu fatin Hera”, nia esklarese.
Ayub Karimi hatutan katak agora sira balun la simu duni osan, tanba lakohi empreza hapara sira-nia kolega balun ne’ebé la prienxe kritériu. Tanba ne’e, sira halo asaun hodi ka’er manu-rade, manu Timór, bibi no fahi sira ne’ebé haki’ak hodi fa’an ba komunidade sira iha tempu kalan.
Ho ida ne’e maka empreza buka nafatin meiu oinsá ko’alia didi’ak ho traballdór sira, nune’e bele komprende hodi hapara tiha sira-nia hahalok ne’e, maibé sira kontinua no lakohi rona empreza. Ikus liu, sira keixa Keshavarz iha polísia.
“Sira lori kompañia mai keixa iha Polísia Nasionál Timor-Leste dehan la selu sira ne’e buat ida la loos. Empreza hakarak selu sira ne’ebé laiha kualifikasaun hodi haruka sira fila, maibé sira balun la konkorda hodi halo asaun hasoru kompañia. Tanba ne’e, empreza laiha dalan seluk no prontu hasoru sira iha Ministériu Públiku tuir dalan justisa, nune’e bele klarifika sé loos maka kontra lei”, afirma.
Empreza daudaun hein desizaun saida maka sei tuirmai no karik kontra lei prontu rekompensa traballadór sira-nia direitu durante serbisu iha Timor-Leste no bele trata fali sira-nia dokumentu atu sira bele hetan fali direitu filafali bá sira-nia nasaun orijen, tanba sira mai ho vistu traballu.
Notísia relevante: PNTL asegura sidadaun pakistanés na’in-10 vítima ba tráfiku umanu
Jornalista: Tomé Amado
Editora: Maria Auxiliadora
