DILI, 03 Jullu 2024 (TATOLI) – Komandu Polísia Nasionál Timor-Leste (PNTL), liuhusi Departamentu Investigasaun Kriminál (DIP) Nasionál asegura ona sidadaun pakistanés na’in-10 ne’ebé deskonfia nu’udar vítima ba tráfiku umanu husi hahalok empreza internasionál balun.
Komandante DIP Nasionál, Superintendente Polísia João Belo Reis, relata katak asaun komandu Polísia nian hodi asegura sidadaun estranjeiru na’in-10 husi Pakistaun ne’e, tanba hetan informasaun husi komunidade sira, inklui autoridade suku no parte igreja.
“Sidadaun na’in-10 ne’ebé agora serbisu iha Timór ne’e kategoria nu’udar vítima ba tráfiku umanu ne’ebé halo husi kompañia internasionál balun ne’ebé eziste iha nasaun. Ita asegura ona sidadaun na’in-10 ne’ebé ita suspeita hanesan vítima ba tráfiku umanu, tanba mai serbisu iha ita-nia nasaun liuhusi prosesu rekrutamentu ne’ebé halo iha Pakistaun. Sira serbisu to’o agora seidauk simu saláriu”, João Belo informa iha konferénsia imprensa ne’ebé hala’o iha edifísiu PNTL Caicoli, ohin.
Superintendente ne’e haktuir katak papél komandu Polisia nian sei asegura vítima sira-ninia direitu hanesan umanu hodi halo mós prosesu tuir lei ba suspeitu sira ne’ebé deskonfia halo prosesu rektutamentu ho ilegalmente hodi trata kondisaun vítima na’in-10 ne’e la tuir lei internasionál ne’ebé vigora.
Tuir nia, empreza sira ne’e identifikadu ona husi rai-li’ur ne’ebé eziste iha Timór, maibé komandu Polísia sei asegura hela nia identidade ba públiku atu dezvia atensaun balun husi suspeitu sira.
“Sidadaun Pakistaun na’in-10 ne’ebé sai vítima ba tráfiku umanu ne’e mai serbisu iha Timor-Leste iha área pekuária nian kona-ba haki’ak animál. Durante ne’e sira hala’o serbisu iha Hera”, nia adianta.
Pakistanés na’in-10 ne’e mai iha Timor-Leste ho durasaun tempu la hanesan, balun mai uluk iha 2022 no seluk iha 2023 no 2024.
“Ita bele dehan kompañia refere legál tanba rejistu ona no kumpre prosedimentu legál husi Estadu Timór nian. Maibé asaun ne’ebé na’in ba empreza halo ne’e maka ita deskonfia nu’udar hahalok tráfiku umanu, tanba la trata direitu ema sira-nian ho dignu. Sira abandona ema sira ne’e ho durasaun tempu ida ne’ebé naruk hodi la hetan sira-nia saláriu”, superintendente ne’e lamenta.
Tanba ne’e, PNTL halo hela prosesu hasoru empreza ne’e no bainhira buat hotu loos ona sei submete ba Ministériu Públiku (MP) depois maka MP uza ninia kompeténsia atu aselera prosesu ne’e ba oin. “Maibé hahú agora Polísia sei halo investigasaun ba vítima sira atu halibur informasaun hotu, rekolla mós sira-ninia dokumentu sira atu sai evidénsia ida hodi aprezenta ba justisa”, adianta.
João Belo salienta katak sidadaun na’in-10 ne’ebé sai vítima ne’e iha kualidade background ema espesialista iha área pekuária, hanesan doutór animál, marketing no finansa.
Jornalista: Tomé Amado
Editora: Maria Auxiliadora
