iklan

BOBONARO, HEADLINE, INKLUZAUN SOSIÁL, MUNISÍPIU

FAO fasilita formasaun asaun antesipa dezastre ba formadór 25

FAO fasilita formasaun asaun antesipa dezastre ba formadór 25

Organizasaun Nasaun Unida ba Alimentasaun no Agrikultura (FAO, sigla ingles),tersa ne'e fasilita formasaun ba formandu na’in-25 kona-ba Asaun Antesipada (AA) dezastre ne'ebé realiza iha munisípiu Bobonaro. Imajen TATOLI/Sérgio da Cruz.

BOBONARO, 08 jullu 2024 (TATOLI) – Organizasaun Nasaun Unida ba Alimentasaun no Agrikultura (FAO, sigla ingles), segunda ne’e fasilita formasaun ba formandu na’in-25 husi liña ministeriál-sira kona-ba Asaun Antesipada (AA) ho tema “Haforsa sistema avizu Antesipada hodi harii reziliénsia hasoru perigu idro-meteorolójiku iha Timor-Leste” ne’ebé realiza iha munisípiu Bobonaro.

Formandu hirak-ne’e mai husi Ministériu Agrikultura, Pekuária, Peska no Floresta, Sekretaria Estadu Protesaun Sivíl no Sosiedade Sivíl sira-ne’ebé serbisu iha área agrikultura.

Reprezentante FAO iha Timor-Leste, Paula Lopes da Cruz, esplika, formasaun ne’e realiza atu prepara formadór sira-nia koñesimentu ba aspeitu hotu-hotu no jestaun dezastre nian, nune’e sira bele fó fali formasaun ba komunidade iha munisípiu sira hotu atu foka ba halo preparasaun molok akontese dazastre naturál.

Notísia relevante: FAO valida AVRP no lansa relatóriu jestaun risku ba dezastre iha Mape no Raimea

“Invezde ita hein dezastre akontese ona maka ita responde, iha ne’e fokus atu halo preparasaun di’ak liután, ita hatene katak bainbain akontese bailoro naruk, inundasaun, saida mak ita prepara antes, asaun antesipada saida mak ita prepara, atu ita-nia komunidade sira bele prepara di’ak liután sira-nia kultivu, sira-nia animál sira bele iha kondisaun ne’ebé ke di’ak, bainhira akontese dezastre ruma lahetan impaktu boot demais, hanesan bainbain akontese ona,” nia hateten iha salaun enkontru CVTL Filiál Maliana.

Formasaun ne’e fokA ba setór Agrikultura, tanba ikus-ikus ne’e klima iha rai-laran mudansa maka’as tebes.

Nia esplika, mudansa klimátika ne’e halo udan-been monu latuir tempu tanba ema halo tiha to’os ho natar depois udan-been laiha tiha fali, buat sira-ne’e fó impaktu ba komunidade, liuliu agrikultór sira.

“Mudansa ne’e fó mós impaktu hanesan ba ita-nia peskadór sira, maluk sira-ne’ebé hakiak animál sira, bailoro naruk ita hatene animál barak mak sofre moras oinoin, depois balun to’o mate, tanba bee menus, duut sira ne’e maran hotu, buat sira-ne’e fó impaktu ba komunidade no hamosu lakon valór umanitaria maka’as tebes,” nia hateten.

Segundu Sekretáriu Autoridade Munisípiu Bobonaro, Semedo Laco, konsidera liuhusi métodu hirak-ne’e bele ajuda ona asaun ne’ebé governu atu halo, tanba durante ne’e dezastre akontese iha fatin-fatin, sempre hetan intervensaun tarde.

“Ida-ne’e bele aumenta ita-boot sra-nia koñesimentu atu muda ba métodu foun, nune’e intervensaun ne’e sedu, tanba ita hatene katak ita-nia rai ne’e foho mak barak liu, depois estrutura rai ne’e la-metin, kuandu akontese udan ho anin mai estraga buat hotu. Ita-nia nasaun ne’e risku boot ba dezastre, ida ne’e mak dalaruma ita hasai osan boot, ita halo estrada foin hotu, seidauk utiliza kotu tiha fali,” nia katak.

Prezidente Autoridade Protesaun Sivíl (APC, sigla portugés), Superintedente Polísia Ismail Babo,l ori governu nia naran agradese ba FAO no konsidera inisiativa di’ak tebes tanba mekanizmu no sistema ne’ebé adota agora.

Tuir nia, asaun hirak-ne’e importante tebes tanba jeografikamente Timor-Leste lokalizadu iha área ne’ebé vulnerável ne’ebé labele hasees husi mudansa klimátika.

“Ohin loron sistema hirak-ne’ebé ita adota armónia no moderniza koñesimentu ita-nia hotu hodi halo prevensaun,” nia katak.

Enkuantu programa ne’e apoia husi Cruz Vermella Timor-Leste no finansia husi Green Climate Found.

Notísia relevante: FAO apoia tablet digital  14 ba estensionista Bobonaro

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!