Konstrusaun Pediatria no ICCU iha HNGV atinje ona 30,13%
DILI, 08 jullu 2024 (TATOLI) – Diretór Servisu Apoiu Dianóstiku no Terapeutika, Vidal de Jesus Lopes, dehan konstrusaun pediatria ho andar lima no Unidade Kuidadu Intensivu Kardiolojia (ICCU) iha HNGV, daudaun ne’e, atinje ona 30,13%.
“To’o agora konstrusaun ba pediatria andar lima no ICCU iha HNGV ne’e to’o ona 30,13%, espera katak bainhira hotu bele responde ona espasu iha HNGV ne’e rasik”, Vidal de Jesus informa iha HNGV.
Rekorda fali katak Governu prevé ho montante orsamentu hamutuk millaun $9.3 no konstrusaun refere ho durasaun tinan rua, hahú 2023-2025 neʼebé kaer husi Empreza China Civil Engineer Constrution Coperation (CCECC).
Lansamentu ba pediatria andar lima no ICCU iha HNGV, hahú iha inísiu fulan-Janeiru 2023.
Iha sorin seluk, Diretór Empreza China Civil Engineer Contruction Cooperation (CCECC), Liang Quing komprometidu katak sei konklui projetu ida-ne’e ho infraestrutura ne’ebé kualidade ba Governu no povu Timor-Leste.
Notísia relevante : Konstrusaun pediatria no ICCU aloka milaun $9.3 ba durasaun tinan-rua
Jornalista : Felicidade Ximenes
Editór : Zezito Silva
