DILI, 26 janeiru 2023 (TATOLI) – Konstrusaun pediatria ho andar lima no Intensive Cardiology Care Unit (ICCU) iha Hospital Nasionál Guidu Valadares ho totál orsamentu hamutuk milaun $9.3 ba duransaun tinan-rua.
“Inisiativa ida ne’e importante no istóriku tebes tanba enkuadra iha ezbosu Ministériu Saúde nian katak iha sira nia vizaun ba aban bainrua atu integra hodi prepara master plan ba HNGV no hospitál Lahane, maibé ikus ita realiza duni kontrusaun ida ne’e”, Primeiru-Ministru Taur Matan Ruak, hateten luhosi nia diskursu iha ámbitu lansamentu ba fatuk dahuluk ba pediatria andar lima ICCU iha HNGV, ohin.
“Ha’u haree dezeñu anteriór ladún di’ak ha’u husu atu halo alterasaun, maibé ho alterasaun lori tempu naruk no probabilidade boot mak labele realiza iha tempu ida ne’e, ikus mai ho apoiu hotu-hotu ne’ebé makas liuliu MS ita konsege no ohin ita lansa ona fatuk dahuluk ida ne’e tanba tempu ona atu investe saúde ne’ebé di’ak liu iha ita nia rain”, Taur Matan Ruak esplika.
Iha fatin hanesan Ministra Saúde Odete Maria Freitas Belo, dehan lansamentu fatuk dahuluk ba pediatria andar lima no ICCU ida ne’e lori tempu naruk maibé ikus realiza duni infraestrutura ida ne’e iha HNGV.
“Prosesu ida ne’e laos foin hahú maibé dezde kedas iha tinan 2010 ne’ebé mak lori to’o mai tinan ida ne’e tanba prosesu dezeñu no ideia oinoin ne’ebé mak tau hamutuk tanba ita hakarak harii kontrusaun ida ne’e iha HNGV, tenke ho identidade timor nian. Ho hanoin ne’ebé mak tau hamutuk ikus ita halo ona lansamentu fatuk dahuluk ba kontrusaun pediatria andar lima no ICCU”, Odete Belo relembra.
Nia afirma MS hahú halo ona kapasitasaun ba profisionál saúde sira atu nune’e haree ba rekursu infraestrutura ne’ebé mak agora daudaun ne’e nian.
“Nune’e ita mós haree ba ekipamentu médiku atu priénxe ba kontrusaun agora daudaun lao ne’e, depois oinsa jere aimoruk sira ba uma boot ne’ebé mak daudaun ita prepara. Ita mós prepara kama hamutuk 327 sei tau iha uma foun ida ne’e, entaun ita presiza profisionál saúde inklui médiku, enfermeiru, parteira, tanba MS ho HNGV presiza ezersísiu ida atu haree kontrusaun remata oinsá mak ospitál funsiona ho rekursu ne’ebé sufisiente inklui medikamentu, ekipamentu saúde nian”, Odete informa.
Diretór Empreza China Civil Engineer Contruction Cooperation (CCECC) Liang Quing komprometidu katak sei konklui projetu ida ne’e ho infraestrutura ne’ebé kualidade ba Governu no povu Timor-Leste.
“Ami komprometidu atu konklui projetu ida ne’e ho infraestrutura ne’ebé kualidade ba Governu no povu Timor-Leste. Ami nia ekipamentu no materiál ba kontrusaun ospitál ne’e iha ona dalan atu mai Timor-Leste”, Liang Quing konklui.
Jornalista : Felicidade Ximenes
Editór : Zezito Silva
