ME aseita inan-aman fó kontribuisaun ba eskola filiál no paralelu
DILI, 08 jullu 2024 (TATOLI)–Ministériu Edukasaun (ME) liuhusi Diresaun Nasionál Ensinu Sekundáriu Jerál (ESJ) no Ensinu Sekundáriu Tékniku Vokasionál (ESTV) aseita ho inan-aman nia kontribuisaun ba eskola filiál no paralelu ho razaun ba andamentu prosesu aprendizajen.
“Karik eskola sira ne’ebé husu inan-aman atu fó kontribuisaun ne’e laiha problema maibé ne’e tenke iha akta reuniaun no inan-aman mak hakarak fó duni. Eskola labele obriga inan-aman sira, tanba Ministériu Edukasaun (ME) bandu,” Diretór Nasionál Sekundáriu Jerál, Benjamin Fernandes, hateten iha knaar fatin, edifísiu ME, Vila Verde, segunda ne’e.
Nia dehan, bainhira eskola hetan difikuldade ruma ko’alia ho inan-aman sira no aseita iha nível ensinu sekundáriu maka bele kontinua.
“Maibé imi hatene katak prosesu hotu-hotu inan-aman mak kaer, ministériu bandu eskola mak kaer inan-aman sira-nia osan hodi jere, bainhira iha rezultadu mak entrega ba eskola,” Diretór akresenta.
Notísia relevante : ME la autoriza eskola sira loke klase parelelu
Iha sorin seluk, Diretór Servisu Edukasaun Munisípiu Baucau, Afonso dos Santos da Costa, salienta, inan-aman fó kontribuisaun osan hodi selu profesór kontinua hanorin estudante sira.
“Kontribuisaun ne’e ba de’it eskola filiál no paralelu sira, tanba prosesu harii eskola referidu iha fatin ne’ebé de’it, ne’e apoiu husi komunidade no inan-aman estudante sira, hafoin Servisu Munisipál no Ministériu Edukasaun aseita hodi estabelese. Agora nia andamentu la’o kuandu Estadu nia seidauk kobre, to’o inan-aman sira tenke apoiu tiha lai. Depois mak ita haree nia prosesu tuir mai, ida-ne’e mak dehan ita kompleta malu hodi asegura eskola la’o diak,” nia dehan.
Afonso dos Santos konsidera, menus profesór iha nível eskola ne’e hanesan problema nasionál, tanba ne’e ME fó dalan ba estudante eskola husi paralelu no filiál sira-nia inan-aman hodi fó kontribuisaun hodi labele difikulta estudante sira iha prosesu aprendizajen.
Jornalista : Osória Marques
Editora : Julia Chatarina
