DILI, 08 jullu 2024 (TATOLI)—Empreza Bali Honey Madu sei mai halo peskiza iha munisípiu sira hodi haree fatin ne’ebé bele halo produsaun bani-been.
“Progresu serbisu ho empreza Bali Honey Madu kontinua la’o, ami iha ona kontaku no hein sira haruka pedidu mai ita aprova hodi aloka orsamentu, sira hahú mai haleu Timor atu haree fatin apropriadu hodi bele halo budi daya (kultivu) ba produsaun bani-been tanba ita-nia honey forest ne’e barak loos. Peskiza ne’e rasik sei hala’o iha tinan ne’e,” Sekretáriu Estadu Kooperativa, Arsénio Pereira da Silva, informa ba Agência Tatoli, iha ninia knaar fatin, Acait, segunda ne’e.
Peskiza ba fatin sira sei hala’o iha tinan ne’e tanba prevee ona orsamentu $1.894.937 iha tinan ne’e ba kategoria bens no servisu.
“Ita hein de’it sira-nia pedidu mai mak haree presiza osan hira hodi aprova, tanba osan iha ona, bainhira sira mai haree hotu ona fatin mak sira mós sei fó formasaun ba ita-nia komunidade liu-liu sira ne’ebé envolve-an iha kooperativa nune’e bele hatene kuidadu to’o ba produsaun no halo esportasaun,” nia akresenta.
Notísia relevante : SEKoop koopera ho Bali Honey Madu halo produsaun bani-been iha Timor-Leste
Governante ne’e konsidera kestaun ne’e importante tanba antes ne’e lori ona amostra bani-been ba koko iha empreza Bali Honey Madu nia labaratóriu ne’ebé hetan ona sertifikadu.
SEKoop aloka orsamentu hamutuk $5.162.599 iha Orsamentu Jerál Estadu (OJE) 2024 ne’ebé fahe ba kategoria haat hanesan saláriu no vensimentu $1.883.897, bens no servisu $1.894.937, transferénsia públika $1.109.065 no kapitál menór $274.700.
“Ita-nia ezekusaun hahú husi janeiru to’o juñu 2024 atinje ona 44,90%, ne’ebé ekivalente ho $2.844.834,06,” Sekretáriu Estadu relata.
Jornalista : Arminda Fonseca
Editora : Julia Chatarina
