DILI, 08 Jullu 2024 (TATOLI) – Sekretaria Estadu Komunikasaun Sosiál (SEKOMS) apoia fundu rihun $18 ba Asosiasaun Jornalista Timor-Leste (AJTL) no Uniaun Profisionál Jornalista Timor-Leste (UPJTL) atu realiza sira-nia programa ne’ebé trasa ona iha tinan ida ne’e.
Sekretáriu Estadu Komunikasaun Sosiál, Expedito Dias Ximenes, informa katak Governu atribui verba ba asosiasaun rua ne’e ho montante lahanesan, ba AJTL disponibiliza rihun $10 no ba UPJTL rihun $8.
“Ita-nia asosiasaun jornalista rua asina ona kontratu ba apoiu fundu husi Governu atu hala’o sira-nia atividade ne’ebé trasa ona. Osan sira ne’e sei transfere liuhusi sira-nia konta bankária ho fazeadamente atu sira bele hala’o atividade”, Expedito Dias dehan iha Palásiu Governu, ohin.
Nia esplika katak transferénsia osan ba asosiasaun rua ne’e kle’ur liu mak semana ida ne’e no sei transfere uluk 40%. Bainhira sira ezekuta ona no submete fali sira-nia relatóriu ba SEKOMS maka foin bele transfere tan 60%.
Objetivu Governu tulun asosiasaun jornalista sira ne’e atu fortifika sira-nia atividade, tanba asosiasaun jornalista mak sai sombriña ida atu halo advokasia ne’ebé forte ba jornalista sira.
Tanba ne’e, tuir governante, Ezekutivu kria meiu ida ne’e atu asosiasaun sira bele tau-matan ba jornalista sira, liuhusi formasaun ida adekuada atu hasa’e sira-nia kapasidade no koñesimentu.
Expedito mós relata katak Timor-Leste Press Union (TLPU) la marka prezensa, tanba sira seidauk prienxe rekizitu jurídiku, entaun seidauk bele hetan direitu ba subsídiu ne’e rasik, maibé bainhira trata buat hotu loos ona maka sira sei hetan oportunidade iha faze tuirmai.
Iha fatin hanesan, Prezidente AJTL, Zevonia Vieira, informa katak fundu ne’ebé AJTL simu ona husi Governu sei utiliza hodi hala’o formasaun kona-ba dijitalizasaun.
“AJTL foka liubá formasaun direitu dijitalizasaun, tanba ohin loron ema hotu moris iha era dijitál. Tanba ne’e, plataforma dijitalizasaun sai asuntu ida importante ba ema hotu liuliu ba joven sira. Formasaun kona-ba direitu dijitál ne’e sei hala’o ba joven sira iha Baucau, Manufahi ho Bobonaro no nia alvu ba liu estudante sira iha nivel ensinu báziku terseiru sikulu no ensinu sekundáriu sira”, nia adianta.
Tuir nia, husi nivel eskolaridade sira ne’e maka iha liu koñesimentu ba direitu umanu liga ba direitu dijitál, nune’e sira bele komprende kona-ba buat sira ne’ebé lori impaktu negativu hodi halo sira sai vulneravel.
Ho kestaun ne’e, AJTL lakohi atu formasaun sobre direitu dijitál ne’e foka de’it ba jornalista sira, maibé importante liu oinsá joven sira bele iha koñesimentu ba meiu sira ne’e.
“AJTL hakarak hamutuk ho joven sira no ema hotu bele hamutuk halo kombate ba informasaun sira ne’ebé la loos. Ho nune’e, liuhusi plataforma dijitál ne’e joven sira bele halo asaun pozitiva”, nia espera.
Prezidente UPJTL, Horácio Babo, afirma UPJTL hanesan parseiru Governu nian ne’ebé halo ona asinatura kontratu atu fasilita asosiasaun nia atividade sira kona-ba formasaun iha área literásia mídia no oinsá bele halo verifikasaun ba faktu sira. Tanba ne’e, atividade formasaun sei realiza uluk iha Dili no ba membru UPJTL, inklui ba joven sira.
UPJTL nia misaun mak sai asosiasaun ida atu trata direitu jornalista sira-nia, ne’ebé UPJTL akumula. Nune’e, liuhusi kongresu UPJTL nian ba dahuluk iha 2021 konsege rejista membru hamutuk 115. Maibé, tuirmai UPJTL tenke arkiva nia elementu balun tanba seluk hili dalan ba apoia fali serbisu polítiku nian no balun bá serbisu ona iha rai-li’ur. Daudaun, membru ativu UPJTL nian hamutuk 105.
Notísia relevante: SEKOMS prioriza nafatin organizasaun jornalista hodi apoia fundu ba sira
Jornalista: Tomé Amado
Editora: Maria Auxiliadora