DILI, 03 Abríl 2024 (TATOLI) – Sekretaria Estadu Komunikasaun Sosiál (SEKOMS) prevee, iha tinan ne’e, rihun $30 hodi apoia ba organizasaun jornalista tolu ne’ebé eziste hodi halo sira-nia atividade.
Sekretáriu Estadu tutela, Expedito Loro Dias Ximenes, hateten SEKOMS tau nafatin prioridade hodi apoia fundu ba Timor-Leste Prees Union (TLPU), Asosiasaun Jornalista Timor-Leste (AJTL) no União da Profissão de Jornalista de Timor-Leste (UPJTL) nia atividade no husu organizasaun tolu ne’e hodi submete relatóriu ba SEKOMS depoizde hetan verba sira.
Expedito Dias relembra katak, iha 2023, SEKOMS iha orsamentu rihun $27,7 ne’ebé prevee ba organizasaun jornalista sira hanesan TLPU no AJTL, maibé tanba asosiasaun sira ne’e la submete relatóriu, entaun osan sira ne’e filafali ba kofre Estadu.
“Loloos osan restu rihun $27,7 ne’e SEKOMS prevee ona atu transfere ba organizasaun jornalista rua ne’ebé antes ne’e eziste, maibé tanba sira la submete relatóriu mai SEKOMS, entaun osan sira ne’e ita labele transfere ba sira”, dehan.
Tanba SEKOMS iha nafatin fundu hodi tulun asosiasaun jornalista sira iha 2024, maka husu responsabilidade ba organizasaun sira ne’e atu submete relatóriu ba SEKOMS.
“Ita espera katak estrutura organizasaun sira ne’e bele submete lalais ida-idak ninia relatóriu, nune’e sira bele kontinua hetan fali apoiu tuirmai iha 2024 ne’e. Ita husu nafatin responsabilidade ba sira atu serbisu ho rigór”, governante ne’e realsa.
Iha sorin seluk, eis-Sekretáriu-Jerál TLPU, Horácio Babo, informa katak relatóriu hotu kona-ba atividade TLPU nian ne’ebé hala’o ne’e submete hotu ona ba Governu.
“TLPU nia relatóriu sira kona-ba atividade ne’ebé halo iha tinan rua ba kotuk ne’e ita submete hotu ona, ne’ebé laiha tan ona problema entre SEKOMS no TLPU”, akresenta.
Jornalista: Tomé Amado
Editora: Maria Auxiliadora
