DILI, 08 jullu 2024 (TATOLI)-Ekipa identiku husi Munisipiu Viqueque ho naran istimadu Warikoan FC susesu iha nia jornada semi-finál hodi tebe-sai adversariu Coach Eleven ho rezultadu 3-1. Vitoria ne’ebé Warikoan rekolla lori kedan ekipa ne’e haksoit ba finál kopa Maun Boot Kay Rala Xanana Gusmão.
Jogu ba ekipa rua hala’o iha Estádiu Munisipál Dili, ne’ebé lidera husi árbitru Francisco Pereira, juiz liña Antonio Carvalho, Henrique Pereira no árbitru rezerva Pedro Braga.
Bainhira árbitru fó ona orden jogu la’o, jogadór sira lansa kedan kontra no atake ba malu tuir tékniku no abilidade ekipa idaidak nian.
Maibé husi forsa hotu ne’ebé iha jogadór Warikoan iha forsa ne’ebé maka’as, hala’o jogu ho disiplina no utiliza tatika hotu ne’ebé iha, minutu 1 jogadór Nencio de Jesus (7) lansa ona golu primeiru hodi mida rezultadu ba 1-0.
Golu ne’e halo Eleven tenke serbisu maka’as iha kampo laran nune’e bele responde golu halo empata jogu ne’e. Warikoan la fó fatin ba Eleven atu hala’o jogu tuir nia hakarak. Oportunidade barak mak avansadu Eleven hetan maibé sempre falla iha lina oin Warikoan nian.
Warikoan mós tenta ho meiu hotu atu aumenta golu maibé seidauk iha oportuniade tanba defeza Eleven nian taka metin.
Eleven nunka lakon esperansa, kontinua esforsu, ikus esforsu ne’ebé Eleven halo la hela de’it hanesan esforsu tanba iha minutu 44 jogadór João Pedro (22) konsege responde golu ida hodi muda rezultadu ba empata 1-1. Golu João Pedro nian mak termina jogu primeira parte.
Hakur ba segunda parte ekipa rua nafatin lansa kontra no atake ba malu, maibé Warikoan hatudu jogu ne’ebé bonitu fó amesa maka’as ba Eleven.
Adeptus husi ekipa rua tur nahe-aan metin iha tribun Estádiu nian hodi hakilar ho lian oioik fó suporta másimu ba sira nia ekipa favoritu. Maibé adeptus Warikoan nian domina liu ho lian ne’ebé maka’as.
Ho jogu bonitu ne’ebé Warikoan halo hatudu duni rezultadu ne’ebé pozitivu tanba iha minutu 57 Nencio de Jesus prodús tan golu segundu muda rezultadu ba 2-1.
Golu ne’e halo Eleven susar liutan, tenke serbisu maka’as liutan, maibé serbisu hotu ne’ebé Eleven halo hela de’it hanesan serbisu tanba nunka prodús golu.
Jogu la’o manas liutab iha minutu ne’ebé atu termina ona, maibé Warikoan kontinua domina bola iha kampo laran nune’e iha minutu 90+2 jogadór Adanilono Xavier (9) termina golu ikus hodi kompleta rezultadu metin ho 3-1.
Husi rezultadu ne’e lori ekipa Eleven tenke hela ho derrota hodi hein fali Buradu ho Laisorulai bainhira joga se mak lakon sei hadau malu fali terseiru lugar. Jogu entre Laisorulai ho Buradu se maka manán sei ba hasoru kedan Warikoan iha finál ne’ebé sei realiza semana oin.
Notísia relevante: Manán Aimou FC 3-0, Laisorulai FC susesu hakaat ba semi-finál iha Kopa Xanana
Jornalista: Hortencio Sanchez
Editór: Florencio Miranda Ximenes
