iklan

EKONOMIA, HEADLINE, MUNISÍPIU, OÉ-CUSSE (RAEOA)

Autoridade RAEOA oferese manu-rade 100 ba grupu komunidade iha Pante Makasar

Autoridade RAEOA oferese manu-rade 100 ba grupu komunidade iha Pante Makasar

Autoridade Rejiaun Administrativa Espesiál Oé-Cusse Ambeno (RAEOA) liuhusi Sekretaria Rejionál ba Asuntu Agrikultura, apoia manu-rade 100 ba grupu komunidade Oéhonis hamutuk uma-kain 20 iha bairru Samoro, aldeia Sanane, suku Costa, sub-rejiaun Pante Makasar. Imajen mídia Agrikultura.

OÉ-CUSSE, 09 jullu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) liuhusi Sekretaria Rejionál ba Asuntu Agrikultura, apoia manu-rade 100 ba grupu komunidade Oéhonis hamutuk uma-kain 20 iha bairru Samoro, aldeia Sanane, suku Costa, sub-rejiaun Pante Makasar.

Sekretária Rejionál Agrikultura, Filomena Sila, informa programa apoia manu rade 100  ba grupu komunidade sira atu hakiak hodi kontinua dezenvolve no sustenta nesesidade família.

“Grupu  hakiak manu rade tenke serbisu ho fuan, haree didi’ak manu hirak-ne’ebé ita apoia ona, depois manu rade sira tolun bele fa’an iha merkadu hodi hetan osan sustenta nesesidade uma laran,” nia hato’o apelu ne’e ba komunidade sira iha bairru Samoro.

Membru Autoridade ne’e, enkoraja komunidade sira, alende hakiak manu, bele hala’o mós atividade seluk hanesan rai no empresta osan, nune’e hamoris liután grupu ne’e ba oin.

“Espera ho apoia ne’e bele motiva di’ak liután komunidade sira, bele halo tan grupu romansa hodi rai osan, no atividade hortikultura nune’e bele sustenta ezisténsia grupu ne’e rasik, atu responde nesesidade uma laran, no sustenta kontinuasaun ba futuru forte liután,” nia dehan.

Domingos Neno Abi, nu’udar responsável másimu ba grupu Oéhonis Samoro, orgullu no agradese Governo bele apoia manu rade, nia promete sei kuida manu rade sira-ne’e, no rekomenda ba parte pekuária atu asisténsia médiku bainhira hetan moras.

“Agradese ba Autoridade RAEOA tanba foin primeira-vez ami bele hetan ajuda, ida ne’e ami sente kontente, ohin ami simu ona hamutuk manu 100, maibé ami nafatin husu atu akompaña nafatin ami liu-liu apoia ai-moruk bam anu sira, bainhira hetan moras ruma,”nia rekomenda.

Xefe aldeia Sanane, suku Costa, Lourenço Liu, agradese no promete sei kontinua akompaña grupu agrikultura sira kona-bá haki’ak manu, nune’e apoia ne’ebé Autoridade oferese bele koresponde direita nesesidade komunidade sira.

“Agradese tanba ohin loron sira mai lori apoiu manu rade ba gropu Oéhonis iha aldeia Sanane, ha’u hanesan lideransa lokal sente orgullu no hakarak informa katak, ami sei observa atividade ne’e, atu nune’e apoia ne’ebé ohin fó bele ajuda duni komunidade sira,” nia katak.

Notísia relevante:Agrikultura Oé-Cusse kuda ai-oan 70 atu hamatak ambiente Parókia Numbei

Rekorda katak, polítika apoia hodi haki’ak manu-rade ne’e, nu’udar programa Planu Asaun Anuál (PAA) autoridade anterior nian hodi implementa iha 2024 ne’e.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!