DILI, 09 jullu 2024 (TATOLI)—Sentru Lojístika Nasionál (CLN, sigla portugés) daudaun ne’e halo hela intervensaun merkadu iha munisípiu haat inklui Rejiaun Administrativa Espesiál Oé-cusse Ambeno (RAEOA).
“Intervensaun merkadu ne’e ita hahú husi RAEOA, Dili, Ataúro, Ermera, Lautém, no Manufahi. Ita iha planu iha tempu badak sei ba halo intervensaun merkadu iha Covalima, ne’ebé ita-nia intervensaun ne’e kontinua la’o,” Prezidente CLN, António de Araújo Soares, hateten, iha salaun Akait, tersa ne’e.
Ekipa halo intervensaun bazeia ba pedidu husi Prezidente Autoridade munisípiu sira ne’ebé rekolla ona husi líder komunitária sira.
“Ba munisípiu haat inklui RAEOA ne’ebé ita halo intervensaun merkadu ne’e foos hamutuk tonelada 250, tanba kada munisípiu ita aloka tonelada 50, ne’ebé husi númeru ne’e tonelada 25 hanesan foos importasaun no tonelada 25 hanesan foos produtu lokál, bainhira konverte tonelada 50 ne’e hetan saku 2.000,” nia akresenta.
Notísia relevante : CLN halo ona intervensaun merkadu ho foos tonelada 150
Inisiativa ne’e tanba haree ba folin foos iha merkadu nasionál to’o rurál ho folin $19 to’o $20, entaun Governu liuhusi CLN faan foos saku ida ho folin $12,50.
Totál produtu lokál no foos importasaun ne’ebé daudaun sei iha armajen CLN hamutuk 5.000.
“Tinan ne’e ita seidauk iha planu atu halo tan akizasaun foos importasaun tanba Governu sei fó atensaun halo akizasaun ba produtu rai-laran, ne’ebé intervensaun daudaun hotu, depois mak haree fali ba akizasaun nian,” nia tenik.
Jornalista : Arminda Fonseca
Editora : Julia Chatarina
