iklan

MUNISÍPIU, VIQUEQUE

Feto potensiál Uatulari husu formasaun hodi partisipa vida polítika

Feto potensiál Uatulari husu formasaun hodi partisipa vida polítika

Feto potensiál Uatulari husu SEI ofrese formasaun kona-ba lideransa ba fetó área rurál. Imajén Tatoli/Vitorino Lopes da Costa

VIQUEQUE, 09 jullu 2024 (TATOLI)-Feto potensiál husi suku Macadique, postu administrativu Uatulari, munisípiu Viqueque husu Sekretáriu Estadu Igualidade (SEI) atu oferese formasaun área lideransa nian ba feto iha área rurál hodi bele kompete iha eleisaun munisipal.

Delegada aldeia Liakaiua, suku Macadique, Nofiana da Cruz, sujere, atividade kapasitasaun sa’ida de’it maka iha tantu iha postu no munisípiu tenke konvida hotu feto potensiál sira kada suku hodi bele kapasita no hasa’e abilidade feto sira.

“Se ita la envolve feto sira iha eventu sira ha’u hanoin, difisil atu hasa’e taxa partisipativu feto iha nivel lideransa no seluk tán. Tanba ne’e mak ha’u hakarak sujere ba SEI envolve feto ba kapasitasaun no diálogu, atu ami iha mentalidade ne’ebé sufisente hodi lidera buat ruma no kompete ho mane sira”, Nofiana da Cruz, hateten ba jornalista sira, iha suku Macadique, ohin.

Maske, Konstituisaun Repúblika Demokrátika Timor-Leste (RDTL) fó garantia ba feto hodi kompete ba iha vida polítika, maibé feto barak maka ladun iha mentalidade hodi partisipa.

“Sebele kria mós sentru formasaun ruma iha suku atu ami-nia feto maluk sira bele tuir, hadi’a sira-nia mentalidade no esperénsia hodi luta ba diretu feto. Atu eleisaun sira mosu karik sira bele fiar hodi kompete. Tanba realidade hatudu ita haree iha eleisaun suku tinan kotuk, akontese iha munisípiu Viqueque kandidatu feto la liu bareira no agora Xefe suku 36  mesak maluk mane sira. Tan ne’e, presiza mellora kapasitasaun ba feto hodi kaderniza feto ba futuru”,nia fó hanoin.

Tuir dadús eleisaun suku ne’ebé hala’o iha tinan 2023 husi suku 36 kandidatu feto ba xefe suku hamutuk na’in-21, maibé rezultadu eleisaun kandidatu feto la eleze ba xefe suku.

Hatán ba preokupasaun ne’e,  Pontu Fokál SEI munisípiu Viqueque, Zulmira Fonseca C. Amaral, hateten, kona-ba formasaun ba maluk feto sira ne’ebé baibain SEI sempre orgniza ne’ebé dala barak realiza formasaun ba feto sira iha suku no munisípiu liuliu ba jestaun no vida polítika nian.

“Nune’e ha’u fó hanoin ba maluk feto sira katak sira hakarak hetan formasaun tenke iha inisiativa organiza malu iha postu no suku. Depois bolu ami SEI hodi koloka formadór sira hodi maiboferese fomasaun. Tanba ita mós iha pontu fokál iha kada postu ona ne’ebé fasil hodi organiza formasaun. Maibé, ba preokupasaun feto potensiál sira Uatulari nian ami nafatin tau ba konsiderasaun”,  nia afirma.

Notísia relevante: SEI kapasita feto potensiál Viqueque partisipa vida polítika

Jornalista : Vitorino Lopes da Costa

Editór : Florêncio Miranda Ximenes

iklan
iklan

Leave a Reply

iklan
error: Content is protected !!