iklan

NASIONÁL, DESPORTU, DILI, HEADLINE

Halakon Buradu FC, Laisorulai sei kontra Warikoan iha finál kopa Xanana

Halakon Buradu FC, Laisorulai sei kontra Warikoan iha finál kopa Xanana

Adeptus sira hatudu espresaun iha Jogu Futebol Kopa Maun Boot Kayrala Xanana Gusmão 2024, Laisorulai FC kontra Buradu, iha estadiun Munisípal Dili, segunda (09/07). Imajen Tatoli/Francisco Sony

DILI, 09 jullu 2024 (TATOLI) – Ekipa istimadu husi Munisipiu Baucau ho naran identiku Laisorulai FC susesu iha nia jornada semi-finál kopa Maun Boot Kay Rala Xanana Gusmão, bainhira  manán adversáriu Buradu FC ho suta penalidade 4-2. Husi rezultadu ne’e lori kedan ekipa kulugisa ne’e tenke bá kontra ekipa Istimadu Munisípiu Viqueque ne’e iha finál.

Jogu ba ekipa rua realiza tersa lokraik ne’e, iha Estádiu Munisipál Dili ne’ebé ánimu tebes ho adeptus atus ba atus ne’ebé tuur haleu tribun Estádiu nian. Hakilar ho lian oioin hodi fó suporta ba sira nia ekipa favoritu.

Jogu Futebol Kopa Maun Boot Kayrala Xanana Gusmão 2024, Laisorulai FC kontra Buradu, iha estadiun Munisípal Dili, segunda (09/07). Imajen Tatoli/Francisco Sony

Bainhira jogu la’o iha minutu primeira parte ekipa rua lansa kedan kontra no atake ba malu tuir tékniku no abilidade ekipa idaidak nian ne’ebé orientadu ona husi treinadór.

Buradu hatudu jogu ne’ebé bonitu, hatudu jogu ho kualidade buka meiu hotu oinsa bele manán Laisorulai, maibé defeza Laisorulai la fó fatin. Alende halo defensivu Laisorulai mós hatudu jogu ofensivu.

Husi rezultadu atake malu ne’e, ekipa rua iha forsa ne’ebé hanesan, maibé Buradu lakohi lakon halo atake ne’ebé adekuadu hasoru Laisorulai.

Esforsu ne’ebé Buradu halo la hela de’it hanesan esforsu, ikus iha minutu 18 jogadór Leonito dos Santos (17) konsege halo jogu bonitu hodi lees ona rede Laisorulai hodi muda rezultadu ba 1-0.

Golu ne’e halo Laisorulai tenke servisu maka’as liutan iha kampo laran. Maske nune’e Buradu hatudu jogu ne’ebé kalma tanba lidera provijoriu ona jogu. Buradu hatudu jogu barak liu defensivu.

Adeptus sira hatudu espresaun iha Jogu Futebol Kopa Maun Boot Kayrala Xanana Gusmão 2024, Laisorulai FC kontra Buradu, iha estadiun Munisípal Dili, segunda (09/07). Imajen Tatoli/Francisco Sony

Luta naruk Laisorulai halo iha minutu primeira parte la konsege hatudu rezultadu di’ak, nune’e minutu primeira parte termina rezultadu mantein ho skore 1-0.

Hakat ba segunda parte Laisorulai la nonok, esforsu aan maka’as ho estratejia oioin hodi responde golu ne’ebé mak Buradu oferese ona ba sira.

Sutu barak mak avansadu Laisorulai halo maibé sutu hirak ne’e seidauk kona iha alvu, sutu barak mós salva husi guarda rede Buradu, nune’e Laisorulai seidauk bele prodús golu.

Biar ladauk halo golu, Laisorulai nunka lakon esperensa, kontinua luta, kontinua joga, hatudu sira nia aan hanesan jogadór profesionál iha kampu laran.

Ho atetude fiar malu no rona malu iha kampu laran ikus iha minutu 63 jogadór Nelson Boavida (8) konsege hatudu nia vontade hodi responde duni golu ida ba Buradu muda kedan rezultadu ba 1-1. Golu ne’e halo Laisorulai kontente no hatudu jogu ne’ebé brillante.

Buradu nia mentalidade hahú tun, jogadór sira nafatin luta maibé laiha fatin atu aumenta golu hodi katik sai husi empata ne’e. Laisoru lai mós esforsu atu aumenta golu maibé laiha tan ona oportunidade to’o minutu normal jogu termina.

Haree ba minutu termina ona ekipa rua tenke hakaat liu-ba sutu penalidade hodi hadau malu sé los mak hatama golu barak nune’e hakaat ba finál.

Iha sutu penalidade ne’e jogadó Buradu nian na’in haat só rua de’it mak bele ezekuta ho di’ak no rua la konsege ezekuta ho di’ak no guarda rede salva.

Enkuantu Laisorulai nian jogadór na’in haat konsege ezekuta ho di’ak penalidade ne’e, laiha jogadór ida mak tiru falla ikus rezultadu hatudu 4-2, Laisorulai mak iha direitu absoluta hodi manán jogu ne’e no Buradu tenke lakon hodi hein fali iha jogu segundu kontra Coach Eleven hodi buka terseiru lugar.

Notísia relevante:Tebe-sai Coach Eleven, Warikoan haksoit ba finál kopa Xanana

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!