iklan

EDUKASAUN, HEADLINE

ME defende teste bolsa kandidatu bele define kualidade edukasaun

ME defende teste bolsa kandidatu bele define kualidade edukasaun

Logotipu Ministériu Edukasaun. Imajen/Espesiál

DILI, 09 jullu 2024 (TATOLI)–Portavós Ministériu Edukasaun (ME), Filipe Rodrigues Pereira, defende katak rekrutamentu profesór liuhusi programa bolsa kandidatu tenke liuhusi teste nune’e bele define kualidade edukasaun.

“Nune’e husu ba antigu profesór kontratadu sira atu ba tuir teste bolsa kandidatu ne’ebé daudaun la’o hela, tanba dalan úniku atu sai profesór iha Timor-Leste mak liuhusi teste bolsa kandidatu profesór, nune’e bele define kualidade edukasaun. Tanba teste bolsa kandidatu ne’ebé daudaun la’o hela ne’e antigu profesór kontratadu sira balun tuir no barak mak liu,” Portavós ME hateten iha salaun VIP ME, Vila Verde, tersa ne’e.

Programa ne’e realiza tanba ME nia funsionamentu tomak la’o tuir regra sira ne’ebé estabelese ona.

“Labele obriga ministériu atu la’o sees husi regulamentu sira ne’ebé mak iha tanba risku ne’e boot. Tanba lei taka dalan mak ita fó kontratu ne’e sé mak atu responsável halo pagamentu saláriu, ne’ebé la fásil ida,” nia akresenta.

Nia dehan, ME sei la fó karta notifikasaun ba antigu profesór kontratadu sira tanba dalan iha.

“Karta notifikasaun ne’e sira ezije ona, maibé ministériu iha mós nia pozisaun ligadu ho asuntu notifikasaun tanba bazeia ba dekretu-lei 32, 27 agostu kona-ba prosedimentu administrativu artigu 26 hateten katak parte sira ne’ebé halo kontratasaun entre parte sira hatene di’ak ona kona-ba kontíudu kontratu. Ligadu ho sira-nia ezijénsia ne’e, sira-nia kontratu ho Ministériu Juventude Desportu iha abríl 2023, iha klauzula ida-ne’ebá hateten katak notifikasaun ne’e halo bainhira kontratu ne’e moris hela, bainhira durasaun kontratu tinan-ida maibé ministériu hakarak hapara iha dalan klaran, entaun ministériu iha obrigasaun atu notifika sira durante loron-30 nia laran, nune’e fulan oin mai tan ne’e sira labele ona hanorin,” Portavós hato’o.

Tanba ne’e, ME sei la foti asaun ruma liga ho karta notifikasaun ba antigu profesór kontratadu sira tanba atu notifika sira públiku sei dehan ME mak hapara maibé sira-nia kontratu mak ramata duni.

“Ministériu Edukasaun sei la tama iha jogu ida hanesan ne’e, ne’ebé ita sei la fó karta notifikasaun ba sira,” nia afirma.

Hafoin kontratu ramata iha loron 31 dezembru 2023, parte rua laiha ona obrigasaun jurídiku atu halo avaliasaun dezempeñu mós ba sira.

“Tanba kontratu termina ona ne’e sira la’ós ona ajente administrasaun públika ministériu nian, entaun ministériu laiha obrigasaun atu halo avaliasaun dezempeñu,” Portavós esplika.

Husu renova kontratu

Iha parte seluk, Portavós antigu profesór kontratadu, Agostinho Pinto, husu ME renova filafali profesór sira-nia kontratu tanba kontratu termu sertu ne’e kada períodu tenke renova.

“Ita-boot sira haree profesór kontratadu tinan 2023 ne’e rekrutamentu liuhusi dekretu-lei númeru 22, 2011 ne’ebé ko’alia kona-ba konkursu ba ajente administrasaun públika. Ha’u hateten dala-ida tan ba asesór sira atu haree didi’ak lei funsaun públika, profesór sira ne’e rekrutamentu liuhusi Komisaun Funsaun Públika (KFP) bainhira tuir lei kuandu hapara funsionáriu ajente públika ida, iha ne’ebá hateten tenke notifika iha lei estatutu funsaun públika artigu 80 atu funsaun públika fó notifika ba profesór sira ne’e komete krime saida ka sala saida,” nia dehan.

Agostinho Pinto konsidera ME laiha razaun atu la fó karta notifikasaun ba antigu profesór kontratadu sira.

“Kontratu ne’e administrativu, dala-ida tan Ministériu Edukasaun labele hatun Primeiru-Ministru nia oin, karik laiha ona kapasidade di’ak liu tun no rezigna-an, tanba somente halo moe no estraga de’it IX Governu nia naran,” nia tenik.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!