iklan

EDUKASAUN, HEADLINE

ME halo revizaun ba modelu no kor ba uniforme eskolár

ME halo revizaun ba modelu no kor ba uniforme eskolár

Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos. Imajen Tatoli/Francisco Sony

DILI, 09 jullu 2024 (TATOLI)—Ministériu Edukasaun (ME) daudaun ne’e halo hela revizaun ba modelu no kor uniforme eskolár ne’ebé iha futuru sei introdús iha eskola sira.

“Ohin ami ho asesór no Diretór Jerál sira haree filafali pontu balun ne’ebé ami deside no halo ona revizaun oituan ba nia modelu ho kor sira. Espera katak sei aselera prosesu ne’e, nune’e bele implementa,” Sekretáriu Estadu Ensinu Sekundáriu Jerál no Tékniku Vokasionál, Domingos Lemos Lopes, informa ba Agência Tatoli, iha edifísiu ME, Vila Verde, tersa ne’e.

ME sei promove tais hanesan identidade Timor-Leste ba uniforme eskolár nune’e estudante sira bele utiliza.

“Parte jurídiku Ministériu Edukasaun haree hela no ami husu atu aselera lalais,” nia akresenta.

Notísia relevante : ME presiza hadi’a pontu balun ba implementasaun uniforme eskolár

Tuir sirkulár ME nian ne’ebé fó sai iha tinan kotuk, katak nia mekanizmu no regra sira-ne’e sei sai husi diploma ida, iha artigu 14, bazeia ba dekretu-lei númeru 32, 33, 34, ho rejime jurídiku sistema nasionál edukativu nian.

“Ida-ne’e tenke ho nia diploma ministeriál ida, liu-liu ba mekanizmu uzu, modelu, kor no kustu, atu nune’e labele prejudika tan inan-aman sira,” governante ne’e reforsa.

Antes ne’e, ME simu fali esbosu diploma ministeriál kona-ba uniforme eskolár iha fulan-juñu, nune’e iha fulan-jullu ne’e hahú hadi’a.

Hafoin prosesu ne’e, sei submete ba Prezidénsia Konsellu Ministru atu ezekutivu sira bele diskute no foti desizaun hafoin bele implementa iha tinan ne’e.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!