iklan

BOBONARO, HEADLINE, MUNISÍPIU, SAÚDE

Moras diabetes-ipertensaun sai ameasa boot iha Timor-Leste

Moras diabetes-ipertensaun sai ameasa boot iha Timor-Leste

Ministériu Saúde realiza atividade workshop kona-ba orientasaun pakote moras lahada'et no ipertensaun ba profesionál saúde sira iha munisípiu Bobobaro. Imajen Tatoli/Sérgio da Cruz.

BOBONARO, 09 jullu 2024 (TATOLI)-Ministériu Saúde (MS) liuhosi Diresaun Nasionál Kontrola Moras, departamentu kontrola moras la hada’et, tersa ne’e realiza atividade workshop kona-ba orientasaun pakote moras la hada’et no ipertensaun ba profisionál saúde sira iha munisípiu Bobonaro.

Xefe Departamentu Kontrola Moras Lahada’et hosi Ministériu Saúde, Mateus Hornai, esplika, atividade ne’e atu fó orientasaun tékniku ba pesoál saúde sira oinsá atu deteta no diagnosa sedu ba moras sira hanesan diabetes ka raan-midar, ipertensaun, kardiovaskulár, respiratóriu krónika no kankru.

Xefe Departamentu Kontrola Moras Lahada’et husi Ministériu Saúde, Mateus Hornai. Imajen Tatoli/Sérgio da Cruz.

Tanba moras la hada’et hirak-ne’e agora daudaun sai hanesan problema boot ba saúde públika iha Timor-Leste ho insidénsia ka prevalénsia ne’ebé aas.

Notísia relevante: Diabetes La Halo Tratamentu Bele Hamosu Disabilidade No Mortalidade

“Agora daudaun pasiente sira-ne’ebé ita deteta ho kazu tensaun ne’e purvolta rihun 40 bo diabetes 700, entaun ita iha mundu ba iha moras hada’et ba iha moras la hada’et. Ita-nia polítika ka estratéjia tenke foka ba moras la hada’et, oinsá ita halo screaning ka deteta sedu ba pasiente sira,” nia ko’alia iha edifísiu Saúde Munisípiu Bobonaro.

Fatór risku hirak-ne’ebé kontribui hasa’e insidensia ka prevalénsia moras krónika sira ne’e mak hanesan; abitua konsumu tabaku, konsumu alkól, konsumu hahan ne’ebé la sudável hanesan haan masin, masin-midar barak liu, konsumu ai-han riku ho kolestról no ladún halo movimentu ka ezersísiu.

Atu prevene ka redús moras hirak-ne’e, Governu kria ona dekretu-lei kontrolu tabaku ne’ebé implementa ona iha 2016.

Nune’e mós instala ona ekipamentu jimnástika iha fasilidade no fatin públiku sira iha territóriu Timor-Leste no kontinua halo promosaun saúde ba komunidade sira atu konsumu ai-han saudável.

“Liga ho ita-nia abitu konsumu hahan, dieta ne’ebé saudável, tenke konsumu masin ho masin-midar menus, ida-ne’e mak ita halo ba ita-nia komunidade sira atubele prevene-aan husi moras  hirak-ne’e,” nia katak.

Diretór Saúde Munisípiu Bobonaro, Gíl Bernardo Vicente, agradese ba Governu ne’ebé realiza atividade ne’e, tanba moras raan-midar no ipertensaun daudaun ne’e sai hanesan ameasa boot ba saúde públika.

Tuir nia, atividade ne’e importante tebes atu pesoál saúde sira bele hatutan informasaun ba komunidade sira iha área rurál no halo screaning iha fasilidade saúde sira atubele deteta no halo prevensaun sedu ba moras krónika hirak-ne’e.

“Ita nafatin husu ba pesoál saúde sira atu halo screaning iha fasilidade saúde sira nune’e ita bele hetan, tanba agora kazu ne’e treanding la halimar, dalabarak ema hateten ema ne’e mate maibé laiha moras. Ida-ne’e tanba ema barak la ba konsulta, istilu vida, han di’ak, hemu di’ak, la halo ezersísiu entaun moras ne’e halo atakasaun derrepente, pasiente ita labele salva, entaun hetan sofrementu ne’ebé ke boot,” nia alerta.

Diretór Saúde Munisípiu Bobonaro ne’e apela ba komunidade sira atu abitua halo ezersísiu no konsumu ai-han produtu lokál sira, tanba produtu importadu sira bele fó ameasa boot ba ema-nia saúde.

Notísia relevante: OMS apela populasaun TL kombate obesidade liuhosi estilu moris saudável

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!