iklan

HEADLINE, POLÍTIKA

PD preokupa tanba ESTV sira seidauk simu osan konsensaun eskolár

PD preokupa tanba ESTV sira seidauk simu osan konsensaun eskolár

Xefe Bankada Partidu Demokrátiku, António da Conceicão. Imajen António Goncalves

DILI, 09 Jullu 2024 (TATOLI) – Deputadu Partidu Demokrátiku (PD), António da Conceição, lamenta tanba Eskola Sekundária Tékniku Vokasionál (ESTV) sira iha territóriu seidauk hetan transferénsia osan konsensaun eskolár husi Ministériu Edukasaun.

António da Conceição hateten ESTV sira fulan neen ona hasoru problema kona-ba osan konsensaun eskolár atu selu sira-nia dívida ba empreza sira.

“Eskola tékniku sira daudaun ne’e enfrenta problema tanba sira laiha osan konsesaun eskolár atu apoia sira-nia nesesidade bázika. Nune’e mós eskola tékniku sira ne’e iha hela dívida ho kompañia sira ne’ebé to’o agora seidauk selu”, deputadu ne’e hato’o iha plenária, ohin.

Nia esplika katak osan konsesaun eskolár ne’e atu sosa suratahan no halo kópia, inklui uza atu hadi’a odamatan no janela eskola nian ne’ebé danifika ona no uza ba halo preparasaun ba ezame sira.

“Tanba ne’e, nu’udar deputadu bankada Governu sujere ba Ministériu Edukasaun atu toma medida ida ho urjente hodi bele fasilita eskola tékniku sira, inklui eskola sekundária jerál sira iha territóriu atu hakmaan sira-nia difikuldade”, dehan.

Iha sorin seluk, Diretór Servisu Edukasaun munisípiu Dili, Sabino da Costa, hateten eskola sira iha Dili, inklui ESTV nia osan konsesaun eskor ne’e sei hein hela dadus atu ajusta ba relatóriu.

“Osan konsensaun eskolár iha Dili ne’e ninia prosesu la’o hela, tanba iha buat balun ne’ebé tenke ajusta ho dadus. Tanba ne’e, nia prosesu sei la’o hela. Ita hein bainhira aloka ona, ita sei atribui ba eskola sira”, nia adianta.

Notísia relevante: ME kapasita diretór eskola sira kona-ba uja osan konsensaun eskolár

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!