DILI, 09 jullu 2024 (TATOLI)—Sekretaria Estadu Igualdade (SEI) realiza workshop durante loron rua, hahú 09 to’o 10 jullu 2024 hodi haree matadalan implementasaun Planu Asaun Nasionál Violénsia Bazeia ba Jéneru (PAN-VBJ), ne’ebé sai polítika Nasionál hodi bele kombate violénsia bazeia ba jéneru iha Timor-Leste.
“Tanba ne’e mak ohin atividade ne’e realiza, ne’ebé hetan kooperasaun hamutuk ho UN WOMEN inklui Rede Referál sira no workshop ida-ne’e hanesan kontinuasaun. Durante ne’e implementasaun la’o di’ak,” Sekretária Estadu Igualdade, Elvina de Sousa Carvalho, informa hafoin atividade workshop ne’ebé realiza iha Suai Room Timor Plaza, tersa ne’e.
Implementa PAN-VBJ ba ohin ne’e datoluk ona maibé bele fó sai nia dezafiu, progresu no rezultadu.
“Nia progresu implementasaun la’o di’ak maibé ha’u hanoin ita sei deskobre nia progresu bainhira workshop loron-rua ne’e ramata ona. Maibé ha’u atu dehan liuhusi implementasaun PAN-VBJ ne’e bele halakon no redús violénsia bazeia jéneru iha Timor-Leste,” nia akresenta.
Notísia relevante : FOKUPERS sei lansa relatóriu violénsia bazeia ba jéneru iha fulan-fevereiru
Reprezentante UN WOMEN, Amy Nishtha Satyam, hateten, workshop ne’e atu hasa’e kapasidade nune’e implementasaun PAN-VBJ bele di’ak liután.
“Workshop ne’e kursiál tebes hodi hasa’e kapasidade ne’ebé di’ak liután no halo ita-nia monitorizasaun implementasaun PAN-VBJ ne’ebé efetivu,” nia tenik.
Objetivu husi workshop mak atu haree filafali indikadór husi implementasaun planu asaun tanba haree hosi indikadór hodi halo monitorizasaun no relatóriu ba implementasaun planu asaun.
Bele uza planu asaun ne’e nia uza dadus hanesan uluk atu reprezenta feto no labarik feto iha sosiedade.
“Entaun workshop ohin ne’e importante no espera la’o di’ak no ita hotu-hotu bele hetan vantajen ne’ebé di’ak,” nia otimista.
Jornalista : Osória Marques
Editora : Julia Chatarina
