DILI, 29 janeiru 2024 (TATOLI)—Fórum Komunikasaun Feto Timor-Lorosa’e (FOKUPERS), iha 16 fevereiru tinan ne’e sei lansa relatóriu hanaran avaliasaun mekanizmu referál violénisa bazeia ba jéneru iha nível eskola no fila hikas bá eskola.
“Objetivu hosi lansamentu relatóriu bazeia ba jéneru ne’e mak oinsá ajuda ka fasilita vítima sira ne’ebé hetan violénsia bainhira sei eskola hanesan grávida no seluk tan mai iha uma mahon, maibé difísil atu asesu edukasaun, entaun bele fasilita sira asesu fali edukasaun,” Diretora Ezekutiva FOKUPERS, Maria Fátima Pereira Guterres, informa ba Agência Tatoli, iha ninia knaar fatin, Farol, segunda ne’e.
Nia nota, durante ne’e estudante balu hetan violénsia hosi eskola no iha uma, maibé manorin sira susar atu identifika problema, enkuantu eskola sira mós seidauk iha manorin espesífiku atu aprosima ba vítima sira-nia problema iha espasu seguru eskola sira, ne’ebé sai hanesan fatin akonsellementu ba vítima sira.
“Entaun ami koko halo ami-nia estudu hodi lansa relatóriu ne’e hodi fornese ba Ministériu Edukasaun (ME) hodi tulun situasaun sira ne’e iha nível eskola,” nia akresenta.
Notísia relevante : FOKUPERS rejista kazu violénsia bazeia ba jéneru 231 iha tinan 2023
Diretora haktuir, vítima balun hela iha uma mahon no hakarak asesu fali ba edukasaun, maibé dalaruma eskola balun simu no balu la simu tanba razaun barak hanesan tauk halo moe eskola nia naran no seluk tan.
“Problema sira ne’e to’o agora FOKUPERS sei hamriik mesak, seidauk hetan ajuda hosi Ministériu Edukasaun, entaun ami rasik buka eskola tau vítima sira ne’e hodi kontinua eskola,” nia tenik.
Diretora ne’e iha esperansa ba oin ME bele apoiu vítima sira tanba FOKUPERS halo estudu komparasaun ho nasaun seluk, nune’e ME presiza koopera ho uma mahon sira hodi lori vítima sira kontinua sira-nia estudu.
“Liga ho moras nia uma mahon bolu parte saúde halo atendimentu ba vítima sira, hanoin servisu sira ne’e husu Governu hamutuk mellora di’ak liután tanba parte ida-ne’e sai nu’udar rekomedasaun Convention on the Elimination of All Forms of Discrimination Against Women (CEDAW) ninian ne’ebé bainhira Estadu Timor-Leste ba aprezenta lakuna sira ne’ebé iha entaun ita-nia responde mak oinsá hamosu polítika hodi fila hikas bá eskola,” nia hateten.
Rekomedasaun sira ne’e la’ós foin CEDAW fó maibé desde iha tinan 2005 nian, ne’ebé komité sira fó FOKUPERS ladun implementa tanba uluk konsidera de’it hanesan polítika orál ida.
“Enkuantu hosi eskola sira manorin mós ladun iha koñesemntu di’ak, entaun ita hanoin tenke iha polítika no eskrita liuhosi relatóriu ne’ebé ita lansa ne’e atubele fasilita manorin no vítima sira bele asesu edukasaun,” nia tenik.
Jornalista : Arminda Fonseca
Editora : Julia Chatarina
