DILI, 29 janeiru 2024 (TATOLI)—Fórum Komunikasaun Feto Timor Lorosa’e (FOKUPERS) rejista kazu bazeia ba jéneru hamutuk 231 iha tinan 2023.
“Hosi tipu violénsia bazeia ba jéneru ne’e, violénsia fíziku komete hosi laen rasik, violénsia seksuál, abuzu seksuál, insestu, tentativa no abandonadu. Hosi kazu ne’e, ha’u bele dehan kazu violénsia fíziku mak boot liu, tuir fali mak kazu abandona, abuzu seksuál menór, kazu insestu no violénsia seksuál,” Diretora Ezekutiva FOKUPERS, Maria Fátima Pereira Guterres, informa iha ninia knaar fatin, Farol, segunda ne’e.
Notísia relevante : FOKUPERS realiza semináriu haforsa sosiedade sivíl hodi promove igualdade jéneru
Nune’e, ekipa responsável kontinua halo advokásia, akonsellementu no fó asisténsia médiku to’o prosesu re-integra filafali vítima violénsia ba família, maibé presiza nafatin apoiu hosi Estadu.
“Hosi vítima sira ne’ebé iha, FOKUPERS simu no haree ida-ne’ebé presiza fó asisténsia ita sei tau iha uma mahon haat, rua iha Dili no rua seluk iha munisípiu Bobonaro no Covalima,”nia akresenta.
Fórum komunikasaun nafatin hamriik metin hodi kontinua luta ba feto no labarik feto sira-ne’ebé hetan violénsia bazeia ba jéneru.
FOKUPERS nia planu foun iha tinan 2024 mak kontinua programa xave importante sira uluk hanaran asisténsia vítima maibé daudaun ne’e hanaran programa empoderamentu sobrevivente.
“Empoderamentu ba sobrevivente ninian hanesan atividade rutina, fó akompañamentu ba vítima sira, asisténsia saúde no seluk tan,” nia tenik.
Jornalista : Arminda Fonseca
Editora : Julia Chatarina
