DILI, 10 jullu 2024 (TATOLI)—Diretór Nasionál Ensinu Sekundáriu Jerál iha Ministériu Edukasaun (ME), Benjamin Fernandes, informa, ekipa legaliza ona diploma 1.655 husi eskola sekundária, iha fulan-abríl to’o juñu tinan ne’e.
“Kada loron ita atende 50, maibé ida-ne’e depende ba situasaun de’it, hanesan bolsa estudu ruma ne’e dala ruma loron-ida bele foti ona,” Diretór hateten ba Agência Tatoli, iha ninia knaar fatin, Vila Verde, kuarta ne’e.
Diresaun Ensinu Sekundáriu Jerál no Tékniku halo atendimentu ba estudante sira-ne’e la demora no depende ba nesesidade bainhira urjente bele foti kedan, maibé bainhira la’ós urjente maka submete dokumentu iha dadeer no lorokraik bele foti, seluk fali dadeer hatama no lorokraik foti se lae aban dadeer fali.
Legaliza diploma la’ós de’it iha Dili maibé iha munisípiu sira, tanba ne’e diresaun atende de’it tuir nesesidade estudante.
“Ami nunka husik prosesu kleur to’o loron-rua ba leten,” nia akresenta.
Notísia relevante : Estudante 3.000 resin hosi eskola haat seidauk hetan diploma
Estudante Jesuina Gomes da Costa, haktuir, nia parte hakarak legaliza diploma tanba hakarak konkorre iha vaga bolsa estudu.
“Ohin ha’u mai iha Ministériu Edukasaun hodi legaliza ha’u-nia diploma ho urjente atu asesu ba bolsu estudu iha Pusat Budaya ba área enfermeira iha Indonézia,” nia tenik.
Jornalista : Osória Marques
Editora : Julia Chatarina
