EDUKASAUN, HEADLINE

Estudante 3.000 resin hosi eskola haat seidauk hetan diploma

Estudante 3.000 resin hosi eskola haat seidauk hetan diploma

Eis Diretór Servisu Edukasaun Dili, Duarte Braganza. Imajen Tatoli/Francisco Sony

DILI, 05 agostu 2022 (TATOLI)–Estudante finalista tinan akadémiku 2021 hamutuk 3.000 resin hosi eskola haat seidauk hetan diploma.

“Ha’u trava hela diploma hosi eskola haat tanba Ministru Edukasaun Juventude no Desportu dehan atu re-embolsa fali ha’u-nia osan ne’ebé ha’u gasta ona hodi halo prosesu asina diploma estudante 16.000 resin, maibé to’o agora laiha rezultadu. Tanba ne’e mak ha’u la kontinua asina diploma estudante 3.000 resin hosi eskola haat,” Eis Diretór Servisu Edukasaun Munisípiu Dili, Duarte Braganza hateten ba Agência Tatoli, via telefónika, sesta ne’e.

Notísia relevante: Estudante finalista na’in-1.813 hosi eskola haat simu ona diploma

Eskola haat ne’ebé seidauk hetan diploma maka hanesan Ensinu sekundáriu Jerál (ESJ) 04 setembru Balide, ESJ FINANTIL, Eskola São Tiago Hera no Eskola Ensinu Báziku Sentrál (EBC, sigla portugés) Metinaro.

Nia dehan, durante ne’e nia parte hakarak koopera atu labele halo estudante finalista sira sai vítima, maibé parte ministériu mak la koopera di’ak ho nia, tanba ne’e nia deside la asina.

“Ha’u la ezije sira, maibé ha’u bazeia ba sira-nia promesa, tanba ne’e sira tenke kumpre promesa hodi re-embolsa ha’u-nia gastu sira durante ha’u halo serbisu iha fulan-haat nia laran ne’e,” nia akresenta.

Biban ne’e, nia mós husu ba ministériu hodi hadi’a kontíudu karta ne’ebé haruka nia asina diploma estudante finalista sira, hodi fó rekoñesimentu ba nia nu’udar diretór atu nune’e diploma estudante sira ne’ebé nia asina bele hetan legalidade.

“Ha’u ezije ida-ne’e maibé to’o agora sira la responde, kontinua bosok hela ha’u nafatin no nunka halo prosesa administrasaun, se kestaun rua ne’e mak sira responde ona, ha’u bele asina hotu ona,” Eis Diretór dehan.

Ba kestaun ne’e, Agência Tatoli tenta konfirma ho parte Ministériu Edukasaun Juventude no Desportu (MEJD) maibé seidauk hetan konfirmasaun.

Antes ne’e, Diretór Servisu Edukasaun Munisípiu Dili, Duarte Braganza inklui Diretór Servisu Edukasaun munisipál haat seluk hetan ona ezonerasaun, enkuantu naran iha diploma nível Sekundáriu Jerál no Tékniku Vokasionál tinan akadémiku 2021 uza sira-nia naran.

Mandatu Duarte Braganza lolos termina iha loron 31 dezembru 2021, maibé tanba mosu desizaun polítika, MEJD hasai despaixu ezonerasaun iha loron 31 outubru 2021 hodi nomea fali Carlito da Silva, nu’udar Diretór Servisu Edukasaun Munisípiu Dili foun.

Ba tinan akadémiku 2021, iha estudante finalista na’in-21.567 iha territóriu tomak mak termina ona estudu iha nível Sekundáriu Jerál no Tékniku Vokasionál.

Iha loron 13 dezembru 2021, estudante finalista hamutuk 58.224 iha territóriu nasionál partisipa ezame nasionál, kompostu hosi estudante Ensinu Báziku 31.143, Ensinu Sekundáriu 22.223, Ensinu Sekundáriu Tékniku Vokasionál 4.858, enkuantu hosi Dili de’it iha totál estudante 16.752.

Nune’e, iha loron 20 janeiru 2022, MEJD anunsia rezultadu ezame nasionál hosi Eskola Ensinu Báziku no Ensinu Sekundáriu iha territóriu tomak, ne’ebé hatudu katak na’in-18 mak la pasa no 50.752 aprovadu, kompostu hosi estudante Ensinu Báziku 31.143 no Ensinu Sekundáriu 22.223.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!