OÉ-CUSSE, 10 jullu 2024 (TATOLI) – Institutu Nasionál Kombate VIH/Sida, Institutu Públiku (INCSIDA, I.P) kontinua disemina infomasaun kona-ba impaktu husi tranzmisaun VIH/Sida ba abitante sira iha suku Cunha, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
“Ha’u ho ekipa mai iha Oé-Cusse tanba rona no hatene katak iha Oé-Cusse mós iha problema HIV/Sida. Ita iha Timór laran tomak to’o marsu 2024 kazu HIV/Sida sa’e ona ba iha 2.042, inklui Oé-Cusse nian hamutuk 73”, Prezidente INCSIDA, Daniel Marçal, dehan iha sede suku Costa.
Tanba ne’e, INCSIDA hamutuk ho komunidade hapara vírus ne’e, tanba ai-moruk ba moras ne’e laiha no labele kura ho ai-moruk tradisionál. “Saúde prepara de’it ai-moruk ida, sei ita kona ona moras ne’e karik hemu atu mantein ita-nia saúde ne’e nafatin normál, sei la hemu vida badak lalais”, nia realsa.
Notísia relevante: INCSIDA husu Oé-Cusse oan hamutuk kombate tranzmisaun VIH/Sida
Prezidente ne’e hateten Servisu Saúde mós prepara hela ai-moruk ba ema hotu, liuliu ba kaben-na’in sira, bainhira infetadu ho moras ne’e bele hemu atu labele da’et ba feen ka la’en.
“Agora, ita-nia kazu sira-ne’e labarik sira tinan 5 mai kraik mós sofre husi hahalok inan-aman. Kazu ne’e barakliu iha Dili, Bobonaro, Covalima, Oé-Cusse no Baucau no munisipíu hothotu iha ona”, nia informa.
Nia esplika katak moras ne’e da’et barakliu husi moris livre ho relasaun seksuál, tanba ne’e prezensa INCSIDA iha Oé-Cusse husu ema hotu hamutuk tau-matan ba moras ne’e. “Ami mai ko’alia ho komunidade tomak iha Oé-Cusse, ita hamutuk salva Oé-Cusse husi moras HIV/Sida ida-ne’e”, nia solisita.
Xefe suku Cunha, Domingos Seco Caunan, dehan atividade ne’e bele hasa’e koñesimentu komunidade nian, liuliu iha suku Cunha atu hatene impaktu husi VIH/Sida, tanba maioria lahatene kona-ba vírus ida ne’e.
“Ha’u espera katak komunidade ne’ebé hela iha suku Cunha bele komprende no hatene tanba durante ne’e laiha sensibilizasaun kona-ba moras ne’e, maibé konsentra de’it iha nivel rejionál. Agradese ba INCSIDA bele mai hasoru direita ho komunidade sira”, nia dehan.
Notísia relevante: INCSIDA husu seropozitivu HIV kontinua tratamentu regulár iha Sentru Saúde sira
Iha sorumutu ne’e, parte Polísia Nasionál Timor-Leste (PNTL) mós halo sensibilizasaun kona-ba trafiku umanu no Lei Kontrbandu.
Totál partisipante iha atividade sensibilizasaun ne’e kuaze ema na’in-300, ne’ebé mai husi aldeia lima mak hanesan Maunaben, Noafafo, Noeninen, Noapai no Umenoah.
Notísia relevante: INCSIDA husu Oé-Cusse oan hamutuk kombate tranzmisaun VIH/Sida
Jornalista: Abílio Elo Nini
Editora: Maria Auxiliadora
