Labarik ida iha Balibo hatudu síntoma moras Raiva
BOBONARO, 11 jullu 2024 (TATOLI) – Hahú husi fulan-janeiru to’o loron (09/07) ne’e Sentru Saúde Komunitária Postu Administrativu Balibo, Munisípiu Bobonaro, rejista vítima asu tata hamutuk na’in-16 no husi númeru ne’e iha labarik feto na’in-ida hosi aldeia Balibo Vila, suku Balibo, mak hatudu síntoma ba moras Raiva.
Xefe Sentru Saúde Balibo, Napoleão Marques, esplika labarik ne’e identifika iha síntoma moras Raiva, bainhira família lori mai konsulta iha semana kotuk.
Notísia relevante: Asu pozitivu Raiva tata labarik ida iha Holsa
“Labarik ne’e asu tata, depois liu loron rua asu ne’e mate kedas, labarik ne’e horisehik ne’e mai hatudu ona sinál ka síntoma, halo nia komesa isin-manas, ulun moras, laran sa’e atu muta, dalaruma ke nia tauk ona atu hare naroman, entaun ho meiu ne’ebé iha ami kontaktu ona ba ekipa vijilánsia munisípiu ho moras ne’ebé iha, ami labele halo vasinasaun, ami halo tratamentu de’it, depois nia rekupera mak ami halo vasinasaun,” nia ko’alia iha Maliana, Segunda ne’e.
Nia dehan, labarik ne’e provizóriu halo hela tratamentu preventiva iha uma no asu ne’ebé tata to’o agora seidauk bele foti amostra.
“Asu ne’e mate tiha, komunidade sira la informa mai sira lori ba haan tiha, entaun ita labele hasai ninia amostra atu hatene asu ne’e pozitivu virus Raiva ka lae,” nia katak.
Nia akresenta, pesoál saúde sira mós durante ne’e halo ona sensibilizasaun ba komunidade Balibo atu lori asu ba simu vasina no bainhira deteta ema ruma asu tata tenke halai lalais ba fasilidade saúde.
Enkuantu vítima tata hamutuk na’in-16 ne’e dadaun ne’e simu hotu ona vasinasaun.
Notísia relevante:Governu lansa vasinasaun animal prevene Raiva iha Bobonaro
Jornalista: Sérgio da Cruz
Editór: Evaristo Soares Martins
