Asu pozitivu Raiva tata labarik ida iha Holsa
BOBONARO, 31 maiu 2024 (TATOLI)- Ekipa konjunta hosi munísipiu Bobonaro, deteta asu pozitivu virus Raiva tata labarik mane ho idade tinan-haat iha aldeia Solugolo, suku Holsa, postu administrativu Maliana, munísipiu Bobonaro.
Ekipa konjunta ne’e kompostu husi Diresaun Servisu Munisipál Agrikultura liuhusi Departamentu Pekuária no Veterinária servisu hamutuk Diresaun Servisu Munisipál Saúde, akompaña husi Komandu Polísia Munísipiu Bobonaro, sesta ne’e intensifika atividade vasinasaun animál iha postu administrativu Maliana tanba iha loron-kuarta, 29 maiu, deteta asu pozitivu virus Raiva tata labarik mane ho idade tinan-haat iha aldeia Solugolo, suku Holsa, postu administrativu Maliana.
Diretór Agrikultura Munisípiu Bobonaro, Longuinhos João, informa, asu ne’e deteta pozitivu virus Raiva bazea ba rezultadu analiza amostra husi Laboratóriu Nasionál.
Notisia relevante: Vítima asu tata iha Bobonaro simu ona vasina rabies
“Asu ne’e tata fali nia-na’in, husi parte Pekuária foti kedas medida urjente no foti ninia sampel lori ba Dili halo teste. Rezultadu hatudu katak asu ida-ne’e pozitivu duni, apartir tempu ne’ebá to’o ohin loron ita hamutuk ho PNTL munísipiu Bobonaro halo servisu konjunta, ita haree fila-fali asu hirak-neʼebé seidauk vasina, ita kontinua vasina atu prevene moras ne’e labele hadaet ba ema,” nia ko’alia iha Holsa, Maliana.
Helena Barreto nu’udar família víctima, haktuir asu ne’e tata nia-oan bainhira labarik ne’e halimar hafoin fila husi família nia uma.
“Asu ne’e tata malu iha kotuk ne’ebá mai to’o pas nia la’o sae mai rakut loos nia, nia moos rasta nia liman halai sai mai liu. Asu ne’e avo sira-nia,” nia hateten.
Diretór Saúde Munísipiu Bobonaro, Gil Bernardo Vicente, esplika, hafoin asu ne’e tata ekipa saúde halo kedas vasinasaun ba labarik ne’e.
“Daudaun ami monitoriza hela kondisaun, sei di’ak, ami-nia ekipa kontinua loron ba loron sempre akompaña hela ninia situasaun, agora nia iha uma hela, ita-nia ai-moruk laiha, só iha de’it vasina,” nia katak.
Biban ne’e, Xefe uku Holsa, António Santa Cruz apela ba komunidade sira iha suku Holsa atu koopera ho ekipa konjunta hodi entrega animál simu vasina no bainhira deteta asu tata ema ruma tenke halai lalais ba fasilidade saúde.
“ita tenke kooopera atu nune’e bele prevene ita nia-aan husi virus ka moras Raivas,” líder Komunitária ne’e fó hanoin ba komunidade suku Holsa.
Tuir dadus husi Dervisu Saúde Munisipál Bobonaro hahú husi fulan-janeiru to’o agora deteta vítima asu tata hamutuk na’in-34. Hosi númeru ne’e konsege simu hotu ona vasinasaun
Notísia relevante: Autoridade Bobonaro preokupa asu-busa movimenta livre iha ospitál Maliana
Jornalista: Sérgio da Cruz
Editór: Evaristo Soares Martins
