Vítima asu tata iha Bobonaro simu ona vasina rabies
BOBONARO, 06 abríl 2024 (TATOLI)-Vítima asu tata hamutuk na’in-20 hosi totál 40 iha munisípiu Bobonaro simu ona vasina Anti-Rabies husi ekipa Servisu Saúde Munisipál hodi halo prevensaun ba virus referida.
Diretór Servisu Saúde Munisipál Bobonaro, Gíl Bernardo Vicente, esplika, durante ne’e ekipa saúde identifika iha ema na’in 40-resin mak sai vítima ba asu tata.
Notísia relevante: Autoridade Bobonaro husu abitante sira labele sosa asu ilegál hosi Atambua
“Sira-ne’ebé ami identifika purvolta 40, husi númeru ne’e iha kuaze 20-resin mak ami fó ona vasina, sira seluk ne’e depois asu tata tiha laiha informasaun, sira-ne’ebé ami halo identifikasun ne’e foti ona ninia amostra, hato’o ona ba nasionál, to’o agora seidauk hetan rezultadu,” nia ko’alia iha Maluana, segunda.
Responsável Servisu Saúde Munisipál Bobonaro ne’e informa, Ministeriu Saúde estabelese ona ekipa Task-Force Munisipál hodi halo prevenesaun ba virus ne’e.
Nia subliña, daudaun ne’e ekipa sira halo hela sensiblizasaun informasaun ba komunidade hotu-hotu iha munisípiu Bobonaro atubele prevene-an husi virus ne’e.
“Ita hato’o katak moras Rabies ne’e tama ona iha Timor, liuliu iha fronteira, importante tebes tanba ita liga direitamente ho sira fornteira,” nia akresenta.
Saúde Bobonaro mos konsiensializa komunidade iha postu administrativu neen no suku 50 iha munisípiu Bobonaro atu hado’ok-an no halo kontaktu beibeik ho animál sira, liuliu asu inklui busa no lekirauk hodi prevene-an.
Bainhira identifika ema ruma mak asu tata tenke halai lalais ba fasilidade saúde atu simu vasina Anti-Rabies.
“Ita labele hanesan uluk, dehan asu tata ne’e bainbain de’it, uluk ita lahatene moras Rabies iha, maibé agora ne’e moras Rabies tama ona Timor,” nia katak.
Tuir dadus ne’ebé Tatoli asesu, animál iha munisípiu Bobonaro ne’ebé simu ona vasina Antirabiotika faze dahuluk ho totál asu 4,817, busa 150 no lekirauk 30, daudaun ne’e rekolla husi suku sira ne’ebé hela iha lina fronteira ho Indonezía hanesan iha postu administrativu Balibo, Maliana no Lolotoe.
Enkuantu daudaun ne’e vasina Antirabiotika iha munisípiu Bobonaro to’o ona faze datoluk ne’ebé sei kobre suku sira iha postu administrativu Maliana Vila.
Notísia relevante: MAP-MS sensibiliza prevensaun hasoru virus Rabies iha Raifun
Jornalista: Sérgio da Cruz
Editór: Evaristo Soares Martins
