DILI, 11 jullu 2024 (TATOLI) – Ministru Negósiu Estranjeiru no Kooperasaun (MNEK), Bendito dos Santos Freitas, hala’o enkontru bilaterál ho nia omólogu Ministru Relasaun Externa Repúblika Angola, Téte António, hodi aborda kona-ba futuru kooperasaun iha setór importante sira no mós fó segimentu ba akordu tolu ne’ebé asina ona.
Durante iha diskusaun, parte rua konkorda atu Governu Timor-Leste ho Angola forma komisaun mista ka joint commission ida-ne’ebé sei envolve ekipa téknika liña ministeriál hodi halo diskusaun ba asuntu sira hanesan petróleu, turízmu, agrikultura, kapasitasaun rekursu umanu no seluktan.
“Komisaun mista ne’e ekipa tékniku ne’ebé ligadu ba asuntu ministeriais hanesan petróleu liu-liu ba gás, ba kapasitasaun rekursu umanu, agrikultura, setór turízmu sira-ne’ebé importante ne’e ekipa téknika sei deside atu halo nia planu kalendarizasaun, atu nune’e Timor-Leste ho Angola liuhusi komisaun mista atubele deside,” Ministru Bendito, tenik liu husi nota ne’ebé Agência TATOLI asesu husi media MNEK, ohin.
Xefe Diplomasia ne’e dehan, vizita Xefe Estadu, José Ramos-Horta nian ba nasaun rua Moçambique ho Angola ne’e hanesan aktu ida hodi reabertura no hametin fila-fali Timor-Leste nia relasaun ho nasaun rua ne’e.
“Prinsipalmente ho Angola ita haree ba sira-nia dezenvolvimentu ne’ebé modernu bele sai mós hanesan instrumentu referénsia ba ita-nia tékniku Timoroan sira mai iha ne’e liuhusi komisaun mista atu bele hala’o servisu didi’ak ba promove dezenvolvimentu ba bem-estar ba ita-nia paíz rua ne’e no povu rua ne’e,” Ministru Bendito tenik.
Akordu tolu ne’ebé Ministru Bendito asina ho nia omólogu Ministru Relasaun Exteriór Angola, Téte António, foin lalais ne’e kona-ba Konsulta Polítika Diplomátika, akordu kooperasaun entre Akademia Diplomátika “Venâncio de Moura” Angola ho Centro Estudo Diplomátika Timor-Leste nian, no mós memorandu entendimentu kona-ba izensaun vistu ba titulares pasaporte servisu ho diplomátika entre nasaun rua.
Notísia relevante:PR Horta inaugura Embaixada Timor-Leste iha Angola
Jornalista: Hortencio Sanchez
Editór: Rafael Ximenes de A. Belo
