BAUCAU, 11 jullu 2024 (TATOLI) – Komisaun Nasionál ba Eleisaun (CNE, sigla portugés) realiza edukasaun sívika kona-ba eleisaun munisipál iha suku Abafala, postu administrativu Quelicai.
Prezidente CNE, José da Costa Belo, dehan hanesan órgaun eleitorál hamutuk ho Sekretariadu Tekniku Administrasaun Eleitorál (STAE) sempre organiza eleisaun hotu iha Timor-Leste no iha futuru sei realiza eleisaun munisipál, tanba ne’e CNE kontinua ba suku sira hodi fó hanoin ba sidadaun atu partisipa iha sufrájiu ne’ebé sei akontese iha tempu besik, entre 2025 no 2026.
“Prezidente Kámara mai, ita hotu tenke hamutuk fihir ho di’ak, foti dezisaun ba rai ne’e, tanba ita-nia votu importante”, Prezidente CNE hateten, ohin.
José Belo argumenta katak bainhira eleisaun munisipál realiza, husu atu eleitór sira labele hili kandidatu sira bazeia ba kór no rasa, maibé vota ba pesóal ne’ebé iha nasionalizmu no patriotizmu, nune’e luta ba povu nia moris di’ak.
Kritéria importante iha eleisaun munisipál ne’e mak kandidatura sei mai husi munisípiu orijen, reprezentante husi partidu polítika no bele independente, ne’ebé sei hili Prezidente Autoridade Munisipál ho vise na’in-rua, inklu membru asembleia munisipál.
“Baucau, Dili, Bobonaro no Ermera bele ona realiza eleisaun munisipál, tanba iha populasaun rihun 100-resin”, José Belo akresenta.
Atividade edukasaun sívika ne’ebé realiza husi CNE iha sede suku Abafala ne’e hetan partisipasaun másima husi komunidade, inklui Autoridade Administrasaun Munisipál no suku.
Notísia relevante: CNE ho STAE introdús prosesu eleisaun munisipál ba komunidade iha Macadique
Jornalista: Natalino Belo
Editora: Maria Auxiliadora
