DILI, 12 jullu 2024 (TATOLI)—Empreza petrolífera australiana, Woodside Energy Group Ltd hamutuk ho sub kontratór sira halo hela serbisu hanesan atualiza dadus ho informasaun sira kona-ba estudu konseitu ba dezenvolvimentu kampu Greater Sunrise hodi bele halo relatóriu ho kualidade no independente atu hato’o ba parseiru sira iha konsórsiu (Sunrise Joint Venture).
Ekipa Woodside hetan kontratu husi Sunrise Joint Venture iha abríl 2024 hodi halo estudu konseitu ba dezenvolvimentu Greater Sunrise.
“Tuir akordu estudu ne’e sei kompleta iha Trimestre dahaat fulan-novembru tinan ne’e no bainhira estudu finaliza sei aprezenta ba Estadi rua, Timor-Leste no Austrália,” Reprezentante Nasionál Woodside, António dos Santos, informa ba Agência Tatoli, via telefónika, sesta ne’e.
Aleinde ne’e, parte Woodside hasoru malu ona ho Sekretáriu Estadu Formasaun Profisionál no Empregu, Rogério Araújo Mendonça, iha semana atu husu kona-ba kapasidade, oportunidade no risku sira ne’ebe Timor-Leste iha kona-ba kontíudu lokál hodi apoiu dezenvolvimentu kampu Greater Sunrise iha futuru mai.
Iha hasoru malu ne’e, ekipa estudu reafirma, banhira Greater Sunrise dezenvolve maka sei presisa rekursu umanu ne’ebé iha kapasidade sufisiente iha área indústria hodi apoiu projetu ne’e.
Parseiru konsórsiu dezenvolve kampu Greater Sunrise kompostu husi Timor GAP, E.P (56,6%), Woodside Energy Group Ltd (33,44%) no Osaka Gas (10%).
Notísia relevante : Governu-Woodside kontinua diskute dezenvolvimentu kampu Greater Sunrise
Tuir prosesu aprovizionamentu kontratu globál ida atribui ona ba Wood Australia Pty Ltd (Wood PLC) hodi halo estudu konseitu Greater Sunrise.
Estudu ne’e sei lidera husi Wood PLC ho ekipa subkontratasaun multi-disiplinár ne’ebé kompostu husi parseiru konsultória espesialista sira.
Estudu ne’e sei konsidera kestaun prinsipál sira ba dezenvolvimentu, prosesamentu, no komersializasaun gás ho foku maka’as ba entrega gás ba Timor-Leste, ba prosesamentu no fa’an Liquefied Natural Gas (LNG) ka alternativa entrega gás ne’e ba Austrália.
Ida-ne’e sei inklui disiplina oin-oin inklui enjeñaria, avaliasaun no finansiamentu finanseiru, kontíudu lokál, estratéjia no seguransa, seguransa saúde no ambiente, no análize sosioekonómiku. Estudu ne’e sei avalia opsaun ne’ebé maka fó benefísiu signifikativu liu ba povu Timor-Leste.
Estudu ne’e sei hala’o ho maneira imparsiál no importante liu sei la fó rekomendasaun ruma ba Sunrise Joint Venture. Ida-ne’e iha alvu atu kompleta la tarde liu trimestre dahaat tinan 2024.
Aleinde ne’e, Sunrise Joint Venture no Governu sira kontinua halo progresu hodi konkorda, kontratu fahe produsaun, kódigu minarai petróleu no rejime fiskál sira, ne’ebé bainhira finaliza sei ajuda hodi fornese serteza fiskál no regulatóriu.
Kampu gás naturál no kondensadu Sunrise no Troubadour ne’ené hamutuk hanaran kampu Greater Sunrise, lokaliza besik kilómetru 150 iha sudeste Timor-Leste no kilómetru 450 iha norueste Darwin, iha territóriu Norte Austrália nian.
Jornalista : Arminda Fonseca
Editora : Julia Chatarina
