DILI 12 jullu 2024 (TATOLI)–Xefe Departementu Edukasaun Inkluzivu no Asaun Eskolár, Berchior Barros, hateten, estudante husi ensinu pre-eskolár to’o ensinu báziku terseiru siklu hamutuk 29.876 sai ona benefisiáriu ba programa merenda eskolár iha munisípiu 12 la inklui Rejiaun Administrativa Espesiál Oé-cusse Ambeno (RAEOA).
“Programa ne’e inklui hotu ona ba eskola katólika no privadu sira hotu,” Berchior Barros informa iha ninia knaar fatin, Vila-Verde, sesta ne’e.
Merenda eskolár dadaun ne’e entrega hotu ona ba munisípiu sira mak responsabiliza enkuantu Ministériu Edukasaun (ME) halo monitorizasaun.
“Ita hatene katak merenda eskolár ne’e ita entrega ona ba munisípiu sira, liuhusi Ministériu Administrasaun Estatál (MAE) mak halo planu orsamentu no atividade sira, ME nia responsabilidade mak oinsá halo monitorizasaun no avaliasaun ba atividade merenda eskolár,” nia akresenta.
Ba tinan ida-ne’e implementasaun trimestre dahuluk ne’e la la’o tanba iha kestaun barak ne’ebé akontese iha baze hanesan iha mudansa estrutura, troka prezidente autoridade sira no administradór, nune’e segundu trimestre la’o fali maibé kuaze tarde oituan.
“Ministériu Edukasaun iha ona Diresaun Nasionál Edukasaun Inkluzivu Asaun Sosiál Eskolár, ne’ebé halo monitorizasaun ba munisípiu sira hotu no daudaun ne’e munisípiu haat hanesan Lautém, Manatuto, Baucau no Viqueque mak halo ona monitorizasaun no implementasaun merenda eskolár, ne’ebé nia prosesu la’o ho di’ak, tuir orientasaun manuál ne’ebé aprova ona iha tinan 2023,” nia tenik.
Notísia relevante : Ekipa konjunta halo inspesaun programa merenda eskolár iha Baucau
Menu ai-han ne’e di’ak tanba sira husi parte Ministériu Saúde (MS) mak prepara, entaun iha monitorizasaun ne’e iha pontu tolu ne’ebé mak ME tau prinsipál mak hahán haforsa, hahán haburas no hahán fó protesaun.
“Maibé eskola sira iha área rurál ne’e iha difikuldade barak ne’ebé sira hasoru mak sira labele sosa ai-han haburas hanesan ikan, foremungu, ne’e difísil tebes atu sira hetan. Eskola sira barak mak sei han koto, mostarda, kanku, na’an ne’e ba sira susar atu sira hetan maski ita hatene katak labarik sira merese han ai-han ne’ebé nutritivu no saudável para fasilita sira-nia saúde no koñesimentu maibé tanba área rurál ne’e asesu ba merkadu susar,” Berchior Barros, relata.
ME sei halo mós sensibilizasaun ba manuál merenda eskolár nia ba eskola sira iha munisípiu hotu tanba sira balun seidauk kompreende didi’ak ai-han haforsa, haburas no protesaun.
“Eskola balun ijene ladún di’ak tanba agora tempu bailoro, entaun anin sempre lori rai-rahun mai, maibé ne’e tanba eskola balun mós bee susar entaun ne’e problema. Maibé merenda eskolár ne’e laiha ai-han importasaun ne’ebé kahor. Kona-ba modo sira ne’e no oinsá labele enkaixa ai-han importasaun ne’e Ministériu Agrikultura mak tenke haree oinsá produsaun iha rai-laran tanba merenda eskolár ne’e loron-loron, entaun sira tenke halo oinsá para ita-nia osan ne’e bele sirkula de’it iha rai-laran do que sai ba li’ur,” nia katak.
Merenda eskolár iha munisípiu Dili ne’e balun la la’o ona tanba sira-nia orsamentu ba segundu trimestre ne’e ba de’it loron-51, tanba ne’e sira implementa hotu ona iha sesta kotuk. Tanba ne’e sira tenke prepara fali halo levantamentu nune’e bele foti fali osan hodi kontinua.
Jornalista : Osória Marques
Editora : Julia Chatarina
