OÉ-CUSSE, 12 jullu 2024 (TATOLI) – Parlamentu Nasionál liuhosi Komisaun B, ne’ebé trata asuntu defeza seguransa no negósiu estranjeiru, kinta ne’e hala’o fiskalizasaun ba komandu Polísia Nasionál Timor-Leste (PNTL), Rejiaun Administrativa Espsiál Oé-Cusse Ambeno (RAEOA), hodi observa menus komputadór no transporte.
Notísia relevante: Eleisaun prezidensiál hela de’it loron tolu, PNTL Oé-Cusse iha de’it karreta ida
Prezidente Komisaun B, Deputadu Domingos Augosto ‘Deker’, hateten, objetivu fiskalizasaun ba komandu PNTL Oé-Cusse atu konfirma direitamente rezultadu ezekusaun Orsamentu Jerál Estadu 2024 nian, la’ós ejize relatóriu maibé hanesan komisaun ne’ebé responsabiliza ba área negósiu estranjeiru no defeza seguransa, iha devér morál tanba fulan ne’e hanesan fiskalizasaun ikus ba preparasaun Orsamentu Jerál Estadu (OJE) 2025 nian.
“Kumputadór balu laiha, ida-ne’e mak realidade maibé esforsu boot ne’ebé komisaun halo mak, liuhusi audiénsia públika sira ho ministériu relevante ho komandante Jerál PNTL, nune’e ba futuru bele iha kondisaun ba fasilidade sira-ne’ebé persiza iha terrenu liu-liu mós transporte,” Domingos Augosto Dekar, ba jornalista sira hafoin enkontru kortejia ho Prezidente Autoridade RAEOA, sesta ohin.
Nia informa, fiskalizasaun ne’ebé deteta mak sai hanesan razaun fundamentál ba komisaun B presiza konfirma ezekusaun 2024 nian hodi sai referénsia ba proposta OJE 2025 nian, atu komisaun B bele defende iha Parlamentu Nasionál.
“Fasilidade sira ita haree, preokupadu tebes maibé labele haluha katak, kondisaun real ita-nia Estadu mak ne’e, tenki otimísta, nu’udar timor-oan labele haluha katak, Timor-Leste ita-nian, tan ne’e maske kondisaun lubun bo’ot mak persiza mellora maibé hakarak fó korajén nafatin katak, ita ko’alia kona-bá seguránsa ne’e la’os PNTL ho FDTL nia responsabilidade maibé timor-oan sira hotu, ita hotu iha devér morál no responsabilidade atu kontribui tuir kondisaun ne’ebé iha ba defeza no seguránsa, nune’e bele asegura ita-nia trai husi ameasa oi-oin,” nia katak.
Prezidente Autoridade RAEOA, Rogério Tiago Lobato, fó-sai iha sorumtu ofisiál ne’e ko’alia kona-bá seguransa defeza sira-nia kondisaun parte polísia no F-FDTL nian, iha menus fasilidade barak.
“Ohin ami ko’alia oinsá, bele hato’o preokupasaun sira-ne’e ba iha Governu Sentrál tanba parte defeza seguransa nian, depende diretamente ba Governu Sentrál, aturálmente hanesan Autoridade RAEOA, tenke mós kolabora ho Governu Sentrál tanba Polísia ho F-FDTL sira serbisu iha Oé-Cusse, entaun oinsa ita hamutuk fó hanoin ba malu atu-bele kria kondisaun traballu no fó meiu para ema bele halo serbisu ho di’ak,” nia dehan.
Notísia relevante: Deputadu Komisaun B husu PNTL investiga suspeitu hadau telefone iha Dili
Jornalista: Abílio Elo Nini
Editór: Evaristo Soares Martins
