DILI, 12 jullu 2024 (TATOLI)—Sekretaria Estadu Igualdade (SEI) asina akordu ho Asosiasaun Feto Munisipál no Fundasaun AHISAUN, sesta ne’e, hodi atribui orsamentu ba realizasaun atividade no programa.
“Sekretaria Estadu Igualdade ohin asina akordu ho sosiedade sivíl no Asosiasaun Feto Munisipál sira ne’ebé durante ne’e sai parseiru prinsipál hodi halo monitorizasaun ba violénsia bazeia jéneru, servisu empoderamentu, inklui feto potensiál iha ekonomia. Ita atribui rihun $134,” Sekretária Estadu Igualdade, Elvina de Sousa Carvalho, informa hafoin asina akordu ho Asosiasaun Feto sira husi munisípiu 13, iha salaun Maria Gorete SEI, Obrigado Barak, Caicoli.
Ajudu orsamentu ne’e hodi benefisiáriu sira bele halo preparasaun ba atividade kongresu iha tempu badak.
Governante ne’e konsidera, liuhusi akordu ne’e bele hadi’a liután atividade SEI iha territóriu ligadu ho empoderamentu, formasaun, ekonomia, no negósiu.
“SEI aloka orsamentu rihun $5 ba kada Asosiasaun Feto Munisipál hodi realiza kongresu ba datoluk nian. Nune’e, Sekretáriu Estadu Igualdade apela ba benefisiáriu, katak orsamentu Estadu ida-ne’e tenke utiliza ho di’ak tanba osan ne’e povu nian,” Sekretária Estadu hato’o.
Notísia relevante : SEI utiliza PAN-VBJ sai polítika nasionál kombate violénsia bazeia ba jéneru
Iha sorin seluk, Prezidente Asosiasaun Feto Munisípiu Baucau, Regina de Sousa, dehan, osan ne’ebé hetan bele transporta maluk husi Polísia Nasionál Timor-Leste, feto agrikultura, feto négosiu no feto empoderamentu.
Asosiasaun Feto Munisipál Baucau iha tinan haat ba kotuk fó formasaun ba líder sira hodi kompete iha eleisaun órgaun suku.
“Iha períodu ida kotuk liubá ne’e iha progresu ida mak ami fó formasaun ba líder feto hodi kandidata-an ba xefe suku no xefe aldeia.
Rezultadu mak kandidatu na’in-27, maibé eleitu na’in-haat no sai xefe aldeia na’in-12,” nia esplika.
Nia konsidera, etapa ne’e mak sai progresu ida ba Asosiasaun Feto Munisípiu Baucau maibé iha dezafiu ida mak iha tinan-haat nia-laran Governu iha programa maibé osan laiha.
“Ami atu ba rejistu iha Ministériu Justisa maibé ami labele tanba tenke ho lian portugés. Entaun SEI ajuda ami tradús depois kongresu mak ami ba rejistu,” nia tenik.
Nune’e mós, Prezidente Asosiasaun Feto Munisípiu Bobonaro, Engrácia Soares, komprometidu sei mobiliza feto potensiál, Asosiasaun Feto, feto empoderamentu sira inklui Polísia Nasionál Timor-Leste no parte ingreja, nune’e sira atubele partisipa iha kongresu nasionál.
“Liuhusi asina akordu ohin ne’e, SEI aloka fundu nune’e ami bele realiza kongresu ba datoluk iha tempu badak. Osan ba Asosiasaun Feto Munisípiu Bobonaro hamutuk rihun $5,” nia hato’o.
Jornalista : Osória Marques
Editora : Julia Chatarina
