DILI, 13 jullu 2024 (TATOLI) – Prezidente Repúblika José Ramos Horta, sábadu ne’e, hala’o vizita ba Paço Espiscopál Arquidiocese Dili hodi hasoru malu ho Arsebispu Arkidioseze Metropolitana Dili Don Virgilio Cardeal do Carmo da Silva no Mgr. Marco Sprizzi hodi koordena no buka tuir preparativu igreja nian hamutuk ho Governu kona-ba vizita Papa Francisco ne’ebé sei akontese fulan-setembru mai ne’e.
“Ha’u mak hakarak duni enkontru ho Amu Papa nia reprezentante pesoál iha Timor-Leste ho Cardeal atu ko’alia kona-ba Amu Papa nia vizita oinsá ona, Prezidente Repúblika mak buka atu kolabora ho Governu ho igreja no Sante Sé atu tane ita hotu nia esforsu atu nune’e Amu Papa nia vizita ne’e sai duni susesu,” Xefe Estadu tenik ba jornalista sira iha Lecidere.
Horta dehan, vizita Papa nian espirituál no hanesan mós eventu diplomatíku ne’ebé boot liu iha Timor-Leste nia istória.
“Ho ida-ne’e mak Prezidente Repúblika tane 100% ba buat hotu ne’ebé Governu, igreja Timor-Leste no Santa Sé prepara. Ohin ha’u mai atu rona mós nesesidade ruma karik iha Prezidénsia Repúblika bele apoiu. Ida-ne’e mak ami ko’alia,” Horta hakotu.
Iha fatin hanesan, Arsebispu Arkidioseze Metropolitana Dili Don Virgilio Cardeal do Carmo da Silva hateten, daudaun ne’e igreja kolabora maka’as tebes ho Governu hodi halo preparasaun hotu ba vizita Papa nian.
“Ami servisu maka’as hela ho Governu, entaun ohin Prezidente Repúblika mai atu buka hatene kona-ba preparasaun sira to’o ona iha ne’ebé. Ita halo ona preparasaun lubuk ida ona hanoin katak iha fulan hira mai tan ita bele simu ita-nia Amu Papa ho di’ak,” Don Virgilio tenik.
Arsebispu Arkidioseze Metropolitana Dili ne’e hateten, igreja Katólika Timor-Leste nia preparasaun ba simu Papa Francisco atinje ona 80% no hetan ona aprovasaun finál husi Vatikanu.
Iha fulan-juñu liubá, igreja distribui ona livriñu orasaun hamutuk ezemplár 15.000 ba iha Parókia hotu iha Timor laran tomak, tuun to’o instituisaun edukativu sira, eskola no grupu kategoriál sira parókia nian atu hotu-hotu iha formasaun.
Autoridade igreja Katólika ne’e subliña, kona-ba 20% ne’ebé atu kompleta ne’e parte Igreja hein de’it ona atu kontrola sasan sira ne’e to’o mai hodi kompleta no iha vizita pastorál sira ne’ebé halo ba Parokia ne’e hatidu katak sarani sira mós iha animu no hatudu sira-nia vontade atu hein Papa Francisco nia vizita.
Notísia relevante:Papa prezide misa iha lian Portugés-orasaun universál lee iha dialeitu 6
Jornalista: Hortencio Sanchez
Editór: Rafael Ximenes de A. Belo
