DILI, 15 jullu 2024 (TATOLI)—Ministériu Transporte no Komunikasaun (MTK) liuhusi Diresaun Nasionál Infraestrutura no Komunikasaun (DNIK) rekolla ona reseita $27.000 husi atividade rejistasaun domain .tl, hahú husi janeiru to’o juñu 2024.
Diretór Nasionál Infraestrutura no Komunikasaun iha MTK, Ambrosio Amaral, hateten, DNIK hanesan instituisaun naun lukrutivu, ne’ebé ninia serbisu maka fó asisténsia téknika ba ajénsia Governu hotu.
“Maibé ita rekolla reseita oituan husi atividade rua hanesan rejistrasaun ba domain .tl no fó aluga fibra backbone nasionál husi operadór telekomunikasaun sira hanesan Timor Telecom no Telcomcel, ne’ebé nia reseita kiik, ba tinan ne’e hahú husi janeiru to’o juñu ba domain .tl ita foin rekolla $27.000, enkuantu ba aluga fibra nian ne’e dadus seidauk tama,” Diretór informa ba Agência Tatoli, iha ninia knaar fatin, Merkadu Lama, segunda ne’e.
Notísia relevante : DNIK tinan ne’e kontinua dezenvolve infraestrutura rede iha postu administrativu sira
DNIK iha tinan 2023 konsege rekolla reseita hamutuk $2.000 husi aluga fibra no rejistasaun domain .tl.
Autoridade Nasionál Komunikasaun (ANC, sigla portugés) mak sai administradór ba domain .tl.
“Bainhira iha ona baze legál ba rejistrasaun domain .tl, maka iha futuru sei rekolla reseita barak, nune’e ami sei halo koordenasaun ho ANC atu prepara lei no regulamentu atu selu hanusa mak DNIK hein halo operasaun ne’e,” nia tenik.
Diresaun ne’e daudaun rejista domain hamutuk 2.251 husi privadu no Governu.
Jornalista : Arminda Fonseca
Editora : Julia Chatarina
