Eskola hein desizaun husi ME ba uniforme eskolár
DILI, 15 jullu 2024 (TATOLI)—Diretór Eskola Ensinu Sekundáriu Jerál (ESJ) 04 Setembru UNAMET Balide, Sérgio Alfredo da Cruz, hateten, parte eskola hein desizaun husi Ministériu Edukasaun (ME) ba uniforme eskolár.
“Kona-ba uniforme eskolár ita hein de’it desizaun husi Ministériu Edukasaun, maibé ba estudante désimu anu ne’e foin lalais ha’u orienta ona estudante sira, liu-liu estudante désimu anu sira uza lai farda metan-mutin,” Diretór eskola informa ba Agência Tatoli, iha ninia knaar fatin, Balide, segunda ne’e.
Parte eskola mós orienta estudante sira, karik iha bin ka maun ruma ne’ebé iha farda, estudante sira bele utiliza no hein bainhira iha farda foun mak uza.
“Kona-ba prosesu ezame segundu períodu ba tinan ne’e la’o di’ak no kontroladu tanba eskola ne’e serbisu hamutuk ho inspetora no superintendente sira hodi kontrola no buat hotu la’o di’ak. Iha ezame segundu períodu loron dahuluk la’o ho di’ak maski konsensaun eskolár seidauk tama. Ami jerente eskola jere nune’e imprensaun matéria ezame susesu no ohin realiza ezame ho di’ak,” nia relata.
Notísia relevante : ME halo revizaun ba modelu no kor ba uniforme eskolár
Totál estudante iha eskola 04 Setembru UNAMET Balide iha 3.000-resin, inklui ona ho klase paralelu. Enkuantu, totál profesór iha 106, kompostu husi profesór ativu 98 no restante moras.
Iha fatin seluk, Diretór Eskola Sekundáriu Jerál 05 de Maio Becora, Casimiro Dias Marques, informa, ezame segundu períodu la’o di’ak no organizadu tebes.
“Ezame ohin ne’e la’o di’ak hotu, antes ne’e dehan konsensaun eskolár maibé bainihira truka foun, ha’u rasik jere no orienta profesór sira hodi prepara matéria no ikus ohin realiza ezame segundu períodu,” nia tenik.
Diretór dehan, maski konsensaun eskolár seidauk tama maibé eskola ne’e uza nia meiu no konsege realiza ezame ho di’ak no garante ezame sei la’o di’ak to’o remata.
Totál estudante iha eskola ne’e hamutuk 1.306, kompostu husi désimu anu hamutuk 352, désimu primeiru anu 452 no désimu segundu iha 502, enkuan totál profesór iha 58.
Jornalista : Osória Marques
Editora : Julia Chatarina
