OÉ-CUSSE, 15 jullu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (PA-RAEOA), Rogério Tiago Lobato, selebra kontratu arrendamentu rai ho empreza internasionál EMG atu konstrui otél, iha área Lifau, iha suku Costa, sub-rejiaun Pante Makasar.
Prezidente Autoridade RAEOA informa asinatura kontratu arrendamentu rai ho empreza atu konstrui otél ne’e sei hahú ho kuartu 54 no faze tuirmai aumenta tan kuartu 80 no ikusliu sei konstrui kuartu 120.
“Ida-ne’e oportunidade di’ak, tanba iha RAEOA difikuldade boot mak iha alojamentu. Ho inisiativa ne’e bele rezolve problema alojamentu iha tempu badak”, Rogério Lobato dehan iha ámbitu asina kontratu, iha Oé-Cusse.
Nian espera katak konstrusaun otél ho kuartu 50 ne’e bele inaugura iha dezembru no sei halo otél ida ho estrutura foun mai husi Xina atu halo instalasaun lais, tanba bainaka dalaruma bá Oé-Cusse buka fatin atu toba susar tebes.
“Fatin ne’e iha Lifau besik aeroportu, kontratu arrendamentu rai ektare lima no kompañia sei selu rai kada metru kuadradu bazeia ba taxa ne’ebé Governu prátika iha lei Timor-Leste nian”, nia adianta.
Dirijente ne’e salienta katak kontratu arrendamentu ne’e ba tinan 50, tanba ema halo investimentu tenke iha seguransa no bele aumenta tanba lei fó dalan, katak ema ne’ebé hakarak investe iha Timor bele halo arrendamentu kontratu tinan 99.
“Importante sira mai halo investimentu ho sira-nia osan rasik no halo otél ida ho tempu badak, nune’e bele hahú simu bainaka sira, tanba sira komesa uluk ho kuartu 54”, katak.
Noel Bernardo de Carvalho ne’ebé reprezenta empreza EMG agradese no promote katak konstrusaun ne’e sei hahú ho kuartu 54, nune’e iha 2025 bele simu ona bainaka.
“Faze tuir ba kuartu 80, ikusliu mak kuartu 120. Sasán sira-ne’e sei lori prosesu hotu. Ami sei realiza konstrusaun ne’e iha tempu badak atu responde ba situasaun ne’ebé daudaun parte Oé-Cusse enfrenta, liuliu ba akomodasaun nian susar tebes atu hetan fatin ne’ebé dignu”, nia salienta.
Notísia relevante: Empreza Shanghai hakarak investe millaun $70 hodi reabilita ótel fitun lima Oe-Upu
Tuir dadus ne’ebé Tatoli asesu, iha 2024, projetu ba faze dahuluk iha infraestrutura mak bee-moos, eletrisidade, torre internét, vedasaun no portaun kuartu bainaka 40 no suite 10 (ho internét, televizaun satélite, duxa bee-manas, ekipamentu ba kafé no xá.
Aliénde ne’e, iha mós restaurant (hahán Xina no Portugál nian) loja otél nian, fatin estasionamentu, CCTV no seguransa, rotunda ba dalan (fonte), lampu solár iha li’ur, sala no lavandaria.
Iha 2025, projetu faze daruak nian mak sei halo tan sala ba jináziu, entrada ka klube (ekipamentu ba rekreasaun no jogu sira), sala bainaka 30 (suite ho jacuzzi), sala enkontru, jardín, ekipamentu ba divertimentu bee nian, manikura ka pedikura.
Iha 2026 to’o 2027, projetu faze datoluk nian mak sei halo kampu desportu sira iha li’ur, sentru komersiál ki’ik, kuartu no apartamentu bainaka nian 120, eskritóriu no suite sira, salaun konferénsia no pixina.
Jornalista: Abílio Elo Nini
Editora: Maria Auxiliadora
