STAE hahú implementa sistema rejistu kartaun eleitorál ho baze biométriku
DILI, 15 jullu 2024 (TATOLI)—Sekretariadu Tékniku Administrasaun Eleitorál (STAE), segunda ne’e, implementa ona sistema rejistu kartaun eleitorál ho baze biométriku.
“Ami hahú ho ema defisiénsia ida, katuas-ferik na’in-rua no joven na’in-rua,” Diretór Nasionál ba Asuntu Jestaun Dadus Rejistu Eleitorál, Teknolojia, Informátika no Informasaun Públika, Túlia Honorina Andrade de Jesus, informa ba Agência Tatoli, iha resintu edifísiu STAE, Caicoli.
Atendimentu dahuluk iha munisípiu Dili no hafoin ne’e ekipa STAE sei sosializa ba autoridade lokál no munisípiu sira, atu nune’e iha tinan ida-ne’e bele kobre munisípiu 12 inklui Rejiaun Administrativa Espesiál no Oé-Cusse Ambeno (RAEOA).
“Tempu ona Estadu Timor-Leste presiza moderniza liután rejistu eleitorál atubele identifika kada votante atu nune’e ita bele hetan dadus ne’ebé konfiável,” nia akresenta.
Kritériu atu halo kartaun biométriku ne’e presiza aprezenta dokumentu válidu inklui sertidaun Batizmu, Billete Identidade ka Pasaporte.
Notísia relevante : Governu sei halo lansamentu kartaun biométriku iha loron 04 maiu 2024
Iha fatin hanesan, Sekretária Komisaun Nasionál Eleisaun (CNE, sigla portugés), Komisária Odete Maria Belo, konsidera, sistema biométriku importante tebes tanba nele fasilita serbisu STAE ne’ebé antes utiliza sistema manuál, semi-biométriku no agora, maibé ho sistema foun ne’e bele moderniza sistema sira barak hodi atende di’ak liután eleitór sira,” nia dehan.
Reprezentante ema ho defisiénsia husi organizasaun Raes Hadomi Timoroan (RHTO), Silvia Antónia da Costa Soares, sente kontente tanba atendimentu dahuluk ba ema ho defisiénsia hodi hetan kartaun eletróniku ho sistema foun ho naran biométriku, ne’ebé hatudu katak Governu hahú tau ona importánsia ba ema ho defisiénsia.
“Ha’u sei fó informasaun ba maluk defisiénsia sira seluk atu sira mós bele mai trata hodi hetan kartaun biométriku,” nia tenik.
STAE iha loron 07 dezembru 2023 aloka osan $600.000 hodi implementa rejistu eleitorál uza kartaun biométriku. Intensaun uza fasilidade ne’e hodi iha eleisaun tuir mai ba suku balun iha tinan 2024.
Kartaun biométriku ida rejista dadus ho eletróniku husi nia titulár, normalmente karakterístika oin hanesan imprime liman-fuan, konfigurasaun oin no matan. Marka sira-neʼe bele lee ho dispozitivu neʼebé analiza no sertifika ema nia identidade.
Ida-ne’e maka prosesu komputadór ida-ne’ebé seguru liu do que observasaun vizuál de’it husi nia portadór. Ida-ne’e mós bele fasilita kria no atualiza baze dadus fásil liu.
Jornalista : Arminda Fonseca
Editora : Julia Chatarina
