Banku Mundiál hakarak kontinua fó apoiu ba Timor-Leste nia dezenvolvimentu
DILI, 16 jullu 2024 (TATOLI)–Diretora Operasionál Banku Mundiál, ba Timor-Leste no Indonézia, Carolyn ‘Carrie’ Turk hamutuk ho nia ekipa, akompaña husi Ministra Finansa, Santina Viegas, hasoru malu ho Primeiru-Ministru (PM), Kay Rala Xanana Gusmão, hodi ko’alia kona-ba prioridade apoiu dezenvolvimentu Timor-Leste.
“Ks’olok boot ba ami bele hasoru malu ho Primeiru-Ministru, ami halo diskusaun di’ak tebes kona-ba prioridade dezenvolvimentu ba Timor-Leste. Ita hotu hatene katak Banku Mundiál nu’udar kolaboradór forte iha Timor-Leste no ami buka atu kontinua no fó apoiu nafatin ba Governu Ttimor-Leste ho prioridade dezenvolvimentu iha futuru,” Carrie Turk, hateten, hafoin ekontru iha Palásiu Governu.
Enkontru ne’e diskute mós kona-ba apoiu Banku Mundiál ba prioridade dezenvolvimentu Timor ninian tanba Banku Mundiál fornese finansiamentu ba investimentu dezenvolvimentu iha mundu tomak.
“Ami mós iha fonte finansiamentu ba Timor-Leste ho ida-ne’e ami halo diskusaun balun ne’ebé Governu hakarak halo investimentu ami prontu nafatin apoiu,” nia akresenta.
Notísia relevante : Banku Mundiál apoia Governu implementa sistema kontabilidade iha TL
PM Xanana mós husu ba parseiru dezenvolvimentu ne’e atu fó apoiu nafatin ba nasaun hotu ne’ebé presiza.
“Ba Timor-Leste ita diskute kestaun lubuk ida ne’ebé prioridade ba Governu, inklui mós ekonomia azul, infraestrutura, adezaun ba ASEAN, serbisu ne’ebé presiza atu sai membru plenu ASEAN hanesan fasilita rekursu umanu sira. Daudaun ami apoia Governu iha parte projetu estrada no ami mós halo hela diskusaun ba projetu sira seluk ne’ebé sei akontese iha futuru,” nia tenik.
Tuir relatóriu husi portál transparánsia Governu Timor-Leste nian, Banku Mundiál iha tinan 10 ikus (2014-2024) fó ona apoiu orsamentu ba Timor-Leste hamutuk $6.043.457,11.
Jornalista : Arminda Fonseca
Editora : Julia Chatarina
