DILI, 16 jullu 2024 (TATOLI)—Ministériu Solidaridade Sosiál no Inkluzaun (MSSI) no Banku Komérsiu Nasionál Timor-Leste (BNCTL, sigla portugés), tersa ne’e, asina akordu alterasaun akordu ba programa Bolsa da Mãe Kondisionál.
Diretór Jerál Ministériu Solidaridade Sosiál no Inkluzaun, Florêncio Pina Dias Gonzaga, hateten, iha fulan kotuk polítikamente MSSI lansa ona prosesu pagamentu Bolsa da Mãe Kondisionál, signifika prosesu sira ne’e la’o antes orsamentu tama ba konta bankária benefisiáriu sira, Governu tenke asina akordu ho BNCTL atu aloka orsamentu.
“Ohin ne’e ita asina akordu ho BNCTL, ita sei halo tranferénsia osan no hahú fulan ne’e BNCTL sei halo pagamentu ba munisípiu 10 inklui Rejiaun Administrativa Espesiál Oé-cusse no Ambeno (RAEOA), la inklui munisípiu rua hanesan Dili no Viqueque,” Florêncio Pina Dias Gonzaga, informa, iha salaun MSSI, Caicoli.
Benefisiáriu ne’ebé sei hetan Bolsa da Mãe Kondisionál antes ne’e hamutuk 69.571, ho totál orsamentu orsamentu $7.066.596, maibé hafoin halo ajustamentu iha mudansa númeru benefisiáriu.
“Totál orsamentu ne’ebé Governu aloka ba Bolsa da Mãe Kondisionál iha tinan ne’e hamutuk $6.642.777, ba benefisiáriu hahú husi nível edukasaun primária, pre-sekundária no sekundária hamutuk 54.688 totál orsamentu hamutuk $5.580.960,” nia relata.
Notísia relevante : MSSI aprova benefisiáriu 69.571 ba programa Bolsa da Mãe Kondisionál 2024
Benefisiáriu husi munisípiu 10 inklui RAEOA mak hanesan ba Aileu totál benefisiáriu husi primária, pre-primária to’o sekunária hamutuk 3.431 ho totál orsamentu $349.344, Ainaro totál benefisiáriu 5.324 ho orsamentu $557.976, Baucau benefisiáriu 6.392 ho orsamentu $659.196, Bononaro benefisiáriu 6.343 ho orsamentu 656.592.
Ba munisípiu Covalima totál benefisiáriu 5.142 ho orsamentu 521.064, Ermera benefisiáriu 4.748 ho orsamentu $488.892, Lautém benefisiáriu 4.928 ho orsamentu $505.116, Liquiçá benefisiáriu 1.594 ho orsamentu 310.296, Manatuto benefisiáriu 3.750 ho orsamentu $370.800.
Manufahi benefisiáriu $4,830 ho orsamentu hamutuk $504.768 no RAEOA benefisiáriu 6.638 ho orsamentu $656.916.
“Munisípiu Dili no Viqueque tama ba faze daruak,” nia tenik.
Ministra Solidaridade Sosiál no Inkluzaun, Verónica das Dores, hateten, Programa Bolsa da Mãe Kondisionál nu’udar programa Governu ne’ebé kontinua implementa hahú husi tinan 2008, bazeia ba dekreitu-lei númeru 18/2012, 04 abríl.
“Dekreitu-lei ne’e hetan alterasaun iha janeiru 2024, hodi halo mudansa ba montante orsamentu ba benefisiáriu sira liuhusi dekreitu-lei númeru 1/2024, 03 janeiru, iha artigu 10 no artigu 11, ne’ebé deskreve mudansa ba montante orsamentu no akresenta liután kondisionalidade eskola ba benefisiariu sira,” governante ne’e esplika.
Programa apoiu kondisionál Bolsa da Mãe hodi garante katak proteje no apoia labarik sira ne’ebé kiak liu ho sustentável no iha impaktu ba tempu badak, médiu no tempu naruk.
Subsídiu apoiu kondisionál Bolsa da Mãe, ho aprezenta valór subsídiu mensál ne’ebé lahanesan, husi $8 no $10, bazeia ba siklu eskolár labarik benefisiáriu sira-nian hodi insentiva frekuénsia eskolár.
Aleinde ne’e, valór sira ne’ebé aloka ba labarik sira ne’ebé ho defisiénsia iha idade eskolár no frekuenta eskola aumenta $5, ne’ebé subliña kompromisu Governu hodi promove ekuidade.
Jornalista : Arminda Fonseca
Editora : Julia Chatarina
