DILI, 16 jullu 2024 (TATOLI)—Parlamentu Nasionál (PN) sei realiza sesaun solene ho onra ho prezensa Sekretáriu Jerál Organizasaun Nasaun Unida (ONU), António Guterres, iha Timor-Leste atu partisipa iha selebrasaun loron konsulta popular (referendu) ba da-25 (30 agostu 1999-30 agostu 2024).
Notísia Relevante:Sekretáriu Jerál ONU konfirmadu partisipa komemorasaun loron konsulta populár
“Iha 30 agostu tinan ne’e, ita iha sesaun solene ba Sekretáriu Jerál Nasaun Unida. Durante resesu, komisaun permanente sei konvoka sesaun solene ne’e iha Parlamentu Nasionál,’’ Prezidente Parlamentu Nasionál, Maria Fernanda Lay, fó sai liuhusi reuniaun plenária iha sala plenária Parlamentu, tersa ne’e.
Tanba ne’e, Prezidente Parlamentu Nasionál (PPN) hato’o ona karta ba Primeiru Ministru (PM), Kay Rala Xanana Gusmão, katak Parlamentu Nasionál (PN) prontu hala’o sesaun solene refere.
Tuir Sekretária Meza PN, Virgínia Ana Belo, hateten Sekretáriu Jerál ONU aseita konvite ne’ebeé hato’o husi Prezidente Repúblika hodi partisipa iha selebrasaun loron istóriku konsulta popular 30 agostu, nune’e sei dezloka mai Timor-Leste entre 28-31 agostu 2024.
Programa vizita prepara husi ekipa konjunta integra Casa Sívil Prezídénsia Repúblika, gabinete Primeiru-Ministru ho Ministériu Administrasaun Estatál.
“Loron ida-ne’e, konstitui momentu selebrasaun no reflesaun kona-ba prosesu ne’ebé lori indepedénsia mai ita-nia nasaun, permite ita-nia nasaun hetan pás no liberdade ba dalan dezenvolvimentu,” nia dehan.
Tuir nia, selebrasaun loron istóriku ne’e hanesan mós selebrasaun demokrásia no soberania povu, ba direitu liuhusi votu, deside livremente ninia destinu no hili ninia lejítimu reprezentante ba Parlamentu Nasionál.
Jornalista : Nelson de Sousa
Editór : Cancio Ximenes
